محمد سقراط – كود//
في البداية ديال حكم الملك محمد السادس كان واحد المنشور كيدور بين الناس سميتو ” مذكرة إلى من يهمه الأمر” كاتبها عبد السلام ياسين، وفيها الرؤية ديال الجماعة لما خاص يمشي عليه الحكم في البلاد ولي لما فيه من صلاح العباد، المذكرة وصلات للبزاف ديال الناس وكانت مطبوعة بأناقة وعانيين بيها ماشي داكشي ديال فوطوكوبي فورقة وصافي ،ومنعرف واش وصلات الملك أو لا، غير هو لي واضح أن الجماعة مابقا فيها لي يكتب مذكرات على هاد الشكل، ولي وضاح من بعد هو أن الملك الناس لي باغين منو شي حاجة راه تواصلو معاه بالمباشر، سلمو عليه وهدرو معاه أو عطاوه رسائلهم، وهادشي ماشي غي فالمغرب بل فالعالم كامل فين مامشا.
كذلك هذا زمن الفيديو ووللى أي واحد يمكن يسجل فيديو ويرفع مذكرة لسيدنا يشوف من حالو، ومن بعد عشرين عام ديال الحكم مابقاوش الناس محتاجين ينضمو لجماعة إسلامية ويتسناو زعيمها ينعس ويحلم عاد يفيق ويكتب مذكرة لمن يهمه الأمر، المغاربة ولاو كلها كينش على كبالتو وكيدوي على راسو، ومابقاوش الرسائل السياسية حكر على القادة، ولاو حتى العونيات كيوجهو خطاب للملك كيف ما شفنا فالفيديو لي دار ضجة فالفايسبوك، ديال أغنية زيد الملك زيد زيد.
هاد الأغنية لي قوتها في البساطة ديالها والوضوح ديال الكلمات والمطالب، ولي كتبين أن العونيات عندهم وعي سياسي وإجتماعي، وبالنسبة ليهم الشعب راه درويش وباغي غير يعيش بيخير وعلى خير، وبهاد التدرويش ديالو قادر يحارب داعش والإرهاب وأي حاجة مافيها نشاط، خاص غير الملك يحيد الشياب ويدير الشباب، ويركز على إصلاح التعليم حيت بالقراية كتعلىة الراية، وطبعا قالو أن هادي ماشي محاولة باش يسعاو كريمة، مابغاوش الوسام بغاو غير السلام والتيقار، وهادشي بلا فذلكة بلا لغة الخشب، وهادشي نيت لي راه بغاوه أغلب المغاربة لي باغين مصلحة البلاد.
