مصطفى المزابي-كود برشيد//

صدرات الجماعة الحضرية ديال برشيد قرار باش يتمنعو الكراول للمجرورين بالدواب ومايبقاوش يتسركلو فشوارع المدينة الرئيسية، حينت كثرو بزاف وللاو دارين مشاكل كثيرة.

وعلمت “كود “، من مصادر مطلعة، أن هاد القرار اتخذاتو الجماعة ديال برشيد باش يمنع العربات المجرورة بالدواب من الجولان فلشوارع الرئيسية بحال شارع محمد الخامس، وشارع الحسن الثاني وشارع مولاي إسماعيل، والقرار كينص على أنه للي ما لتزامتش وتشد غادي تنزل عليه عقوبة مالية مع حجز العربة ديالو، وذلك بعدما ولات تتشكل هاد الظاهرة مصدر لشكايات لمواطنين .

المصدر ذاتو، أضاف أن نسخة من هذا القرار  ترسلات إلى السلطات المحلية بالمدينة والمصالح الأمنية وباقي الجهات المختصة، من أجل تفعيل هذا القرار الجماعي لي اعتبروه متتبعين للشأن المحلي بمدينة برشيد خطوة مزيانة باش توقف الفوضى التي تعرفها بعض الشوارع بالمدينة، والتي يشتكي منها المواطنون والسائقون والمهنيون، مضيفة أن المجلس غادي يقتارح مجوعة من الحلول على أصحاب هاد العربات المجرورة بالدواب باش يلقاو حل توافقي، وتنقا المدينة من الزبل لي تيخلفوه هذا العربات.