عمـر المزيـن – كود//

حسمت وزارة الداخلية الاحتقان للي رافق الاحتجاجات فمدينة فكيك ضد انضمام المجلس الجماعي ديال المدينة إلى مجموعة الجماعات الترابية “الشرق للتوزيع”، بدعوى أن تفويض تدبير قطاع الما للشركات الجهوية متعددة الخدمات كيعني الخوصصة ديال هاد المادة الحيوية.

البارح الخميس فمقر عمالة فكيك وضح مدير الشبكات العمومية المحلية بوزارة الداخلية، العامل مصطفى الهبطي، باللي الشركات الجهوية متعددة الخدمات غادي تمكن من تعميم الولوج للخدمات فالجهة الشرقية مع الموازنة الترابية، بالإضافة إلى تقليص الفوارق المجالية وضمان تدبير متجانس وعادل للمرافق.

العامل الهبطي اللي كان مرفوقا بوالي الجهة الشرقية أكد أن التسعيرة ديال استهلاك الما الصالح للشرب وحتى المصاريف ديال الربط مغادي تعرف حتى شي زيادة بعد إحداث الشركات.