الدريب لـ گود: الناصيري عطى لكثير للوداد وهادي صفحة وطويناها ودابا حقبة جديدة برئاسة البرناكي وغنخدمو لإرضاء الوداديين
عفراء علوي محمدي- كود//
قررات وكالة المغرب العربي للأنباء (لاماب) تحبس البث ديال الندوة اللي كتديرها وزارة الصحة، يوميا مع الستة دالعشية، على الوضعية الوبائية لفيروس كورونا المستجد، واللي كتبثها منصات التواصل الاجتماعي، وكتعطي لاكسي لقنوات التلفزيون الرسمي باش يدوزوها.
وحسب بلاغ للوكالة، توصلات بيه “كود”، غتولي “لاماب” تكتفي غير بالأرقام المتعلقة بالرصد الوبائي ديال هذ الفيروس، من إصابات جديدة ومجموع إصابات وحالات تعافي ووفيات، وماغيمكنش للمواطنين يتبعو الندوة اللي كتدير الوزارة بشكل مباشر بحال العادة.
وحسب البلاغ دائما، غتهتم “لاماب” باستئناف النشاط الاقتصادي والاجتماعي بشكل اعتيادي، مع دعم الجهود المبذولة لمواجهة الجائحة، وغتنشي بالتالي فاتجاه التطبيع والتعاييش مع الوباء.
واليوم، الندوة اللي كتديرها وزارة الصحة كَاع مادازت فالتلفزيون الرسمي، والمواطنين شحال وهوما يتسناو المباشر باش يعرفو حصيلة الفيروس لهذ النهار، لكن الندوة ماتبثاتش نهائيا، والوكالة ماعلماتش حد بهذشي قبل.
وفالصفحة الرسمية لفضاء التواصل مع وزارة الصحة، عبرو مجموعة من الصحافيين على الغضب ديالهم بسبب عدم بث الندوة، بزاف منهم اعتبروه “استهثار”، و”تهاون”، فالوقت اللي الوزارة خاصها فهذ الوقت تتواصل مزيان مع الرأي العام، بعد ما تخفف الحجر الصحي وارتفع عدد الإصابات بفيروس كورونا بشكل ملحوظ.
والمعطيات للي وردات الحد الآن جابتها “لاماب” والإعلام الرسمي فقط على شكل أرقام، بينما الصحافيين لخرين ماوصلاتهوم حتى شي معلومة، وهذشي اللي خلاهم يكعاو ويلومو الوزارة على “ضعفها فالتواصل”.
ودابا مع عدم بث الندوة، غتولي المعلومة بعيدة على المواطن بخصوص الوباء، وغيمكن يخليه يقلل من احتياطاتو الوقائية، فالوقت اللي خاص يكون زيار أكثر مع ارتفاع عدد الإصابات فالآونة الأخيرة.