كود هناء ابو علي ///

واحد لوقيتة ماشي بعيدة بزاف كانت الخطوط الملكية المغربية عندها عدد الطائرات بحالها بحال الخطوط التركية. يمكن كل شركة كان عندها شي خمسين. دابا لارام عندها بالضبط 59 والخطوط التركية كثر من 336 وعندها مخطط فالسنوات القليلة تولي عندها 500 طيارة.
الخطوط الاثيوبية نفس الشىء عندها 110 طيارة. لارام كانت كثر منها ودابا ولات مضوبلانها هي.

علاش هاد الشي. حقاش كانت الامور غادية مزيان. حتى نهار اللي غادي يتعين فيه ناصر بوريطة وزير منتدب فالخارجية وكان الوزير ديك الساعة صلاح الدين مزوار. هاد التعيين وقع فالعيون وهو يخرج بلاغ باللي طار ادريس بنهيمة وجابو حميد عدو اللي كان جرا عليه لحسن لحداد باش كان وزير السياحة٬ من المكتب الوطني للسياحة بسباب ضعفو. تصورو يجري عليه حداد شحال مقودة فالسيڤي ديالك.

اللي دافع على هاد عدو واللي ساندو بسباب قرابة مع مرات شخصية قوية بزاف فالبلاد٬ خرج على هاد لبلاد. خرج على تطور الشركة. خرج على شركة كانت تعتبر من احسن شركات الطيران فافريقيا. مديرها قال باغيين نافسو الجزائر اللي حتى هي باغية تشد السوق الافريقي. هاد الدولة استثمرات 2.5 مليار دولار باش تشري طيارات جداد هادي عام ونص. يمكن مع كورونا فيروس توقف كلشي.

جا هاد عدو ودار صحابو فالبلايص زوينين وراه “كود” سبق نشرات موضوع فهاد الشي. خرج فحوار مع “ليكونومسيت” وكذب علينا كلنا وقال باللي غادي يتزاد فيه 8 طيارات. هاد الشي كان ف2018. ديك الساعة يالله جا ولقى الوضعية المالية للشركة مزيانة، لقى بنهيمة دار الخدمة الاساسية وهو يرجع الروح لشركة كانت قريبة لفاييت

دابا هادا جا اش قال ليه راسو نحيدو 20 طيارة. واش هادو فورث ورثيه. اش من صفة تقول هاد الشي. وحتى ايلى بغيتي تبيعهم دابا غادي تبيعهم خردة. كيفاش هاد الباتريموال ديال شعب كولو تجي بقرار غبي بفشلك فابداع حلول مزيانة وترجع الشركة يالله عندها 40 طيارة.
كاع الدول اللي عندهم مدراء عامون واعرين مبدعين نقصو من اليد العاملة وخلاو الطيارات حقاش ديال الشعب. المغرب محتاج هاد الطيارات.
ها علاش تجيب شي حد من عائلة مرات شي شخصية نافذة بزاف. كيكون غبي وعندو اللي يدافع عليه.

دابا قضية يحيدو 160 او حتى 180 بيلوط مهمة وخاصهم يحيدو هادوك الباسلين اللي كيشدو اكثر من 15 مليون وطمعو ف3 الاف درهم ايامات الحجر الصحي وكورونا فيروس. خاص هاديك الجمعية اللي دعماتها جزء من الدولة فحربها ضد بنهيمة تعرف باللي راها فالمغرب. الامكانيات قليلة. دابا اللي سخن عليه الراس راه الباب عرض من كتافو. اليوم هاد الشي ممكن بعد اتفاقية دارتها الدولة المغربية وقرها المجلس الوزاري واللي فيها ان القوات الجوية المغربية تتكلف بتكوين ليبيلوط. يعني ايلى شي نهار بغاو يديرو الاضراب يدخل لبيبلوط الجيش فبلاصتهم ويشدو فالبوطة.

ولكن راه بلا ما يحيدو هاداك عدو اي قرار كيهم لارام غادي يكون ما عندو جدوى. خاصو يطير اولا عاد نشوفو اش نديرو من بعد.