كريم الشركي – كود //
من البارح فنص النهار و 3 الدريات قاصرات من قرية “بن الطيب” بإقليم الدريوش، وهوما غابرات على ديورهوم، وماتلقاو حتى للساعات الأولى من صباح اليوم.
عائلات هاد لبنيتات مشاو دارو شكاية عند الجوندارم، ومن بعد أمرات النيابة العامة بالبحث عليهم، وما تلقاو حتى لشي 3 ديال صباح اليوم.
هاد البنات صرحو للدرك أنهم مشاو من “بن الطيب” لبلدية الدريوش اللي هي مركز الإقليم باش يتساراو فيها، وتعطلو فالعشية ومالقاوش الطاكسيات باش يرجعو لديورهم وبقاو واحلات، وتلاقاتهوم واحد السيدة ودخلاتهم لدراها ولكنها جرات عليهم من بعد فنص الليل.
بعدها حسب تصريحات البنات الثلاثة، مشاو كَلسو فواحد القهوة، وتماك غايلقاوهوم الجوندارم، وأمام أقوالهم أمرات النيابة العامة بعرضهم على الخبرة الطبية باش يشوفو ياكما تعرضو لشي اعتداء أو لاشي حاجة.
