محمد سقراط-كود///

هادوك الإرهابيين الأميين لي قتلوا جوج سائحات آمنات في بلاد الخير والأمان حوز مراكش بشمهاروش بالظبط راه قتلوهم حيت كافرات من بلاد الكفر، وغير مؤخرا هادوك المجرمين لي قتلوا بوليسي حي الرحمة لي هو مغربي بحالو بحالنا ولكن قتلوه على ود السلاح وحيت كافر ويمثل الدولة الكافرة في نظرهم، وهادوك لي هجموا على نجيب محفوظ ولي قتلوا فرج فورة ومهدي عامل وحسين مروة راه قتلوهم من بعد قتاوى تكفيرية، حيت التكفيري مكيقولش فلان خاص واجب قتله، لا هو ماشي حمق ومعندوش البيضات باش يعلن بكل جرأة على الأفكار ديالو، هو كيجيب من طريق طويلة كيبدى الهدرة على الرسول والسنة والقرآن ومعاناة البخاري في جمع الأحاديث وكيفاش أن بلا بيها لا يكتمل الإسلام ويبدى في تعداد مناقب الصحابة ورواة الحديث حتى كيوصل لفلان شكك في السنة النبوية راه كافر بإجماع علماء الأمة، شنو كتعني هاد كافر أنه دمه مهدور وقتله فيه ثواب وأجر عظيم.

وهادشي لي دار الشيخ صار مع الدكتور الفايد الملتحق أخيرا بصفوف التنويريين القوميين، ماقالش أنه واجب قتله مباشرة ولكن قال أنه كافر يعني إلى كان شي واحد بحال مول الألمنيوم لي قتل بوليسي الرحمة أو هادوك القتالة ديال شمهاروش راه غادي يمشي يسمر للدكتور الفايد ويقتلوا باش يدي الآجر ويمشي للجنة ويكون حمى الإسلام والمسلمين ممن يشككون في عقيدتهم، واخا راه الدكتور الفايد مكيشكك في عقيدة حد كيهدر بالمنطق ديال أن أحاديث كثيرة راه خزعبلات وماجاتش نقدسو هدرة واحد دار جمع الأحاديث من بعد 200 عام من موت الرسول وحنا كمغاربة معنرناش حتى رواية وحدة متافقين عليها للأحداث لي عاشها المغرب في الإستقلال وبعده غير هادي ستين عام كلها وقصتو.

نهار كيكتب الشيخ صار أو الغلام مول الفوقية على شي حد أنه كافر بإجماع علماء الأمة هادي راه دعوة صريحة للقتل والإرهاب وماشي رأي فقهي ولا ديني، التكفير هو الوقيدة لي كتشعل عافية الإرهاب وأن الدولة تبقى ساكتة وكتفرج لبحال هاد الدعوات راه غير مفهوم، ومن بعد تستغرب على بوليسي مغربي كان واقف كيدير خدمتو بكل تفاني وإخلاص حتى جاو جوج مغاربة بحالو قتلوه وحرقوه باش يدخلو للجنة، أو شنو لي يخلي مغربي من دوار حربيل يمشي يسمر على جوج سائحات يذبحهم انتقاما لإخوانه في سوريا وهو اخوانه الحقيقيين غير حداه في بلعكيد معندذو حد في سوريا، لي يخلي المغاربة يديرو هادشي هو التكفير وماحد الدولة مكتعاقبش عليه بحالو بحال الإرهاب وتعطي عليه عقوبات متشدد راه غادي نشوفو الكوارث ديما.