كود مالگا ///
فاول رحلة بين كازا ومطار مالقا جنوب اسبانيا مشات عامرة. 159 بلاصة. مغاربة كثار كانو حاصلين تماك وبداو يدخلو حتى هما من البارح. مغاربة اخرين عندهم ديور وفيلات واستثمارات فالكوسطا ديل سول وحصلو هنا. ديورهم توسخات وترفصات.
كاينين اللي كيجيو عندهم الامكانيات وكيمشيو للعطل. غير هاد العام هاد الكوسطا ديل صول خاوية. واحد مول الطاكسي فبين المدينة قال ل”كود” باللي هاد العام ما جاش للمدينة فوسط يوليوز حتى 20 بالمائة من اللي مالف يجي ليها. الطاكسيات ولاو مع الازمة كيخدمو نهار ونهار اللا.
لمغاربة كانو كيدوزو عطلتهم بزاف هنا. ارقام كتهدر علي 600 الف مغربي كيقطع البحر فالصيف. كثر من 400 الف كتبقى فكوسطا ديل صول. الباقي كيمشي لدول اخرى ولا مناطق اسبانية اخرى.
ميناء “بويرطو بانوس” كيصفر فهاد الوقت. من الطونوبيلات لقلال اللي كاينين واحد المرسيديس ديال مغربي. مستافد من الازمة وباينة بوكو لعاقة.
لكن هاد العام اجواء الصيف ما كايناش. تماك فهاد المنطقة بحال 11 منطقة اخرى من اصل 17 فاسبانيا كاينة اجبارية لكمامة. تماك ما كايناش لملاغة بحال بلادنا. يا لكمامة يا مائة اورو. ياخد لاكارط ناسيونال ديالك ويزمم ليك.
فالمغرب كاينة اجبارية الكمايم ولكن ما كاينش التزيار فهاد القضية. الصبليون كاع ما تفكرو فيها فالعطلة. راه عذاب مع الكمامة والمواطنين حتى هما فين ما شافو شي حد ما دايراهش ما يركبش فالنقل العمومي ولا الطاكسيات وفالشارع يمشيو يقولو ليه ديرها ولا ما بغاش البوليس يحضر. يعني هاد لمغاربة حسن ليهم يدوزو عطلتهم فبلادهم هاد العام واخا عندهم ديور تماك. راه صعيب دوز عطلة فظروف بحال اللي كاينة فاوربا وشدو لرض حسن ليكم.
