عفراء علوي محمدي- كود//

هذ نصف الشهر الأخير، من 13 حتى ل26 أكتوبر، المغرب سجل 45984 حالة، وتوفاو فيه 737 واحد، وهذ نصف الشهر هو الأكبر من حيث عدد الإصابات والوفيات على الإطلاق.

وحسب النشرة النصف شهرية ديال وزارة الصحة، فمعدل الإصابة الأسبوعي لكل 100 ألف نسمة فات 50 فأغلب المناطق فالمغرب، وتحديدا فجهة كازا سطات والرباط سلا والجهة الشرقية ومراكش آسفي والعيون الساقية الحمرا والداخلة واد الذهب، فالوقت اللي فأنصاف الأشهر الأخرى كانو جهات قليلة اللي واصلة لهذ المعدل.

وفهذ النصف كذلك، بلغات النسبة الإجابية من مجموع عدد الكشوفات 15,15 فالمية، فالوقت اللي تحددات النسبة فالنصف اللي فات ف13 فالمية.

بالنسبة للوفيات الأسبوعية، فهذ السيمانة، من 19 حتى ل25 اكتوبر 373 اللي ماتو، وهو أعلى معدل دالوفيات كيتسجل فاسبوع منهار بدا الوباء.

وفهذ الأسبوع كذلك، المغرب حطم الروكور فعدد الحالات الحرجة اللي متواجدة فأقسام العناية المركزة، بحيث ساءت الحالة ديال 650 واحد، فالوقت اللي كانو 521 فالسيمانة اللي فاتت.

والمغرب طاح ب2 مراكز عالميا فعدد المصابين بفيروس كورونا المستجد، وولا كيحتل دابا المركز 32، بينما بقى فالمركز 36 عالميا من ناحية الإصابات، والمركز 31 عالميا من حيث الكشوفات.

أما على المستوى القاري، الوضعية دالمغرب بقات مستقرة، بحيث بقا فالمركز 2 من حيث عدد الحالات، الثالث من حيث عدد الوفيات، 2 من حيث الكشوفات.