كود كازا//

عرف المغرب ارتفاع ملحوظ فالإصابات والموت، فالفترة الممتدة ما بين 6 حتى ل18 يوليوز 2021، بحيث طلعو الإصابات ب91,7 فالمية، والموت ب62 فالمية، بالمقارنة مع حصيلة السيمانة اللي فاتت.

أما بخصوص المنحى الوبائي الأسبوعي، قال عبد الكريم مزيان بلفقيه، رئيس قسم الأمراض السارية فوزارة الصحة، أننا سجلنا زيادة ب91,7 فالمية هذ السيمانة بالمقارنة مع السيمانة لي فاتت، بحيث سجلنا  هذ الأسبوع 15170 إصابة، مقابل 7912 السيمانة اللي فاتت.

وبالنسبة لمنحى الوفيات الأسبوعي، فسجلنا ارتفاع فيه كذلك، بالمقارنة مع الأسبوع اللي فات، بنسبة 62 فالمية، حيت سجلنا 81 وفاة هذ المرة، بينما الأسبوع اللي فات كانو ماتو 50.

وبخصوص عدد الوفيات حسب الجهات، كتجي جهة كازا سطات فالمقدمة ب21 وفاة، بعدها ومراكش آسفي ب11، وسوس ماسة ب10، وفاس مكناس ب9، وطنجة تطوان الحسيمة ب5، و3 فكل من العيون ودرعة تافيلالت والرباط سلا، و3 وفيات فالجهة الشرقية، 2 فكَلميم وادنون، و1 فكل من الداخلة وادي الذهب وبني ملال خنيفرة.

أما نسبة إيجابية التحاليل، فجهة كازا سطات فهذ السيمانة كتجي فالرتبة الأولى ب21,3 فالمية ديال الإيجابية، كتجي بعدها جهة سوس ماسة درعة ب21 فالمية، ثم جهة مراكش آسفي ب17,2 فالمية.

وتسجل ارتفاع فعدد المرضى اللي كاينين فأقسام الإنعاش، بحيث فالسيمانة اللخرة، طلعنا من 281 حالة ل413 حالة، بينما تحدد عدد الناس اللي كيديرو التنفس الاصطناعي الاختراقي ل14 مصاب.

اما بخصوص مؤشر توالد الحالات، فطلع ل1,45 فحدود 18 يوليوز الجاري، فيحين كان فحدود 1.31 فحدود 11 يوليوز.

وبالنسبة لترتيب المغرب، أكدات وزارة الصحة فنشرتها أن المغرب نزل بمركز واحد على مستوى الاصابات والوفيات والكشوفات عالميا، وولا كيحتل على التوالي المركز 42 و48 و51 عالميا.

أما على المستوى الإفريقي، بقى المغرب فالمركز 2 فالإصابات والكشفات، والمركز 4 فالوفيات.