تهديدات داعشية بالقتل لناشطات فالحريات الفردية. نادر ل”كود”: وجود لائحة كيبين باللي كاين رصد وتتبع وهاد الشي ما كيخلعنيش
سهام البارودي – كود//
أول مرة سمعت بلي ندى حاسي قبلات تجوج بنزار السبيتي داك الدري لي باين بلي عندو شي مرض نفسي و لا شي نوع من انواع التوحد قلت مع راسي ماكاين لا جواج لا تاخصية هاد السيدة باينة باغا طلع القناة ديالها و تفرگع المشاهدات و داكشي لي كان ! طليلة خفيفة على قناة ندى حاسي قبل و بعد نزار السبيتي غاتبين ليك بلي السيدة فاش تجوجات بنزار ! تجوجات بڤيطامين ديال الادسنس ! شحال هادي الڤيديوات ديالها كانو كايضربو المشاهدات ولكن ماعمرهم وصلو للسقف لي وصلو ليه مع نزار و هنا فين كاين سر هاد المضاربات و المطايفات على نزار السبيتي بين ابطال السوشل ميديا فالمغرب !
نفس الشيء بالنسبة للملولي ! ايه عندو قناة قبل من نزار و ايه عندو الدرع الذهبي قبل مايكون نزار و كايدير ڤيديوات و معروف و لكن تحليل بسيط لنسبة مشاهدة الڤيديوات ديالو قبل مايبان معاه نزار كايبين بلي القناة ديالو كانت كاتموت و بلي نزار عتقها من الاحتضار !
نزار السبيتي ! فالحقيقة تاواحد ماكايبغيه ! ندى ماعمرها بغاتو و ماعمرها عتابراتو راجلها تجوجات بيه من الاجل الادسنس و داكشي لي كان السيد طلعات بيه قناتها و ضبرات بيه على اشهارات و آيفون جديد و تكلف ليها بالمصروف و الخروق و الرضاضع د البنت مع الثلاتة د الصباح … و الملولي تاهوا ماكايبغيهش و ماكايبغيش ليه الخير كيما كايقول كايبغي الادسنس لي كايجي منو ! من نهار تعاشر الملولي مع نزار و هوا مهني مع راساتو و مامحتاجش يقلب على موضوع للڤيديوات ديالو حيت نزار هوا الموضوع لي ماعمرو ماكايموت ! آخر ڤيديو ديال الملوي قبل مايجي عندو نزار لكازا كان فيه 64K و لكن غي حط نزار يديه فالقناة دار ليها داكشي ديال الشكربكربن و بداو المشاهدات ماكايطيحوش على نص مليون مشاهدة 500k
فالحقيقة گاع دوك لي كايدورو في فلك نزار السبيتي ماكايبغيوهش و ماكايبغيوش ليه الخير حيت صعيب تبغي شي واحد فحال نزار و صعيب يكون عندك صديق او حبيب او زوج فحال نزار ! السيد كايعاني من مرض نفسي كايخلي التعامل ديالو مع الآخرين تعامل غير طبيعي و هادشي واضح فالڤيديوات ، السيد ماكايعرف يهضر ماكايعرف يضحك ماكايفهم تقشاب ماكايفهم حشيان الهضرة … حركاتو غير طبيعية ! شوفاتو غير طبيعية … كلشي فيه ماشي طبيعي و حتى عائلتو مافاهماش او ماراضياش تعتابر ولدها مريض و غير طبيعي و محتاج يكون متبع عند طبيب نفسي يشخص الحالة ديالو بعدا واش توحد و لا شي حاجة اخرى.
نزار السبيتي ظاهرة ! ڤيطامين ديال الادسنس ! تكون القناة ديالك طايحة فالفراش كاتنين من ألم قلة المشاهدات ، جيبو حداك و صور معاه ڤيديو و غايجيب الله التيسير هادشي علاش نايضة عليه الحرب بين الملولي و حاسي و لي كايدورو فجنابهم ! هاهوا باغي يدير كومبا مع الملولي هاهوا تابع ندى باغي يتجوج بيها ، غدا غايغوت على مو و يتبرى منها حيت خاصمات ليه على المرا، بعدو غايهرب على ندى و يمشي عند الملولي لكازا ، بعد بعدو غايبكي حيت خاصم على مو …
و مازال غايرونها مع الملولي
و مازال غايرونها مع مو
و مازال غايرجع لندى حاسي حبيبتو و غايرونها معاها تاهي
و مازال غايتحدى الملولي فشي كومبا و يتساب معاه
كأي “نزار” تقدر تسنى منو أي حاجة و هادشي علاش نايضة عليه المخاطفة