سهام البارودي كود ///

مات العالم الاستروفيزيائي ستيفن هاوكينغ اليوم و الجرائد العالمية تأسفات عليه ! الوزيرة الأولى ديال النگليز تيريزا ماي قالت عليه ” بلي كان دماغ واشمن دماغ و واحد من أكبر علماء جيله” رئيسة الوزراء ديال الهند قالت عليه بلي ” من العلماء الكبار لي ساهمو فجعل الكوكب أحسن” و بزاف ديال الشخصيات المهمة عزات فيه و تأسفات على موتو! فجامعة كامبريدج العريقة لي قرا فيها مدة خمسين عام اليوم كان يوم حداد ! لدرجة أنه طلبة قدام ديالو ديبلاساو من مدن و بلدان بعيدة فاش سمعوه مات باش يعزيو فيه ! وا لانازا آ عباد الله ! لانازا عزات فيه !

و يجي بخوش ولد بخوشة، نهار يموت ماغايسيق ليه الخبار تاواحد و ماغايفتاقد دينمو تاواحد و ماغايحس بيه تاواحد ، يكتب ليك فالفايسبوك ” نفق ملحد” ! و يجي واحد أبخش منو و يكتب ” ألا لعنة الله على الكافرين” و تجي بخوشة اكثر تبخشيش من هادو بجوج و تكتب ليهم ” لا يجوز الترحم على كافر”
ايييييييه آ سيموحمد كون نتا عالم كبير

وقري فكامبريدج من أعرق الجامعات فالعالم مدة خمسين عام
و كتب الكتوبة فالفيزيك و الكوسمولوجي و الماط
و تجاوز الاعاقة و المرض و ساهم فالبحث العلمي
و حل بزاف ديال الاشكاليات العالقة فلاستروفيزيك
و من فوق كروسة انتج و خمم و فكر و كتب و حلل
و راكم البحوث ! و راكم الميداليات و الأوسمة
و نهار تموت غايعزيو فيك الناس من السند و من الهند
و هاكاك غايجي شي بخوش ولد بخوشة ماعطا للإنسانية تاخرية لا هوا لا خوتو و لي ماقادر ينتج حتى داك البابي طواليط باش كايمسح الخرا من فمو او ترمتو على حساب حيت غالبا كايكون كايخرا منهم بجوج و لي المساهمة الوحيدة لي كايقدم للمجتمع ديالو و للدولة ديالو هي كايساهم فخنق الواد الحار و بسبابو كاتغلى علينا الفاتورة ديال لاسينيسمو ! و غايقوليك ” نفق ملحد” ! و غايختازل العطاء ديالك الكبير للانسانية فكلمة ” ملحد” ! و غايزيد حداها ” نفق” ! زعما لي مات بهيمة ! و هوا لي كاتب هادشي أكبر بهيمة ! لاحطيتي غا الانتاجات ديالو قدام الانتاجات ديال هاوكينغ دغيا غاتعرف و بسهولة شكون البهيمة و شكون الانسان !
و هذا هوا التفكير ديال شي اسلاميين هدفهم فالحياة يحاربو العلم و الجمال و المنطق، لي ماكايعبروش قيمة الانسان بدرجة العطاء ديالو و لا بدرجة المواطنة ديالو و لا بروح المسؤولية لي عندو لا ؟ واش هوما حماق ؟ هوما طيلمو مجلجين ! مجمكين ! مسدود لدينمهم العقل كو كايشوفو بنادم بميزان واحد كايقسم الناس لجوج ديال الفئات ” مسلم vs كافر”
آ سيدي أنا متأكدة بلي ستيفن هاونكينغ كون تعطاتو فرصة يرجع يقوليكم شي كلمة نتوما بالضبط كان غايقوليكم الرحمة ديالكم زيدوها فكركم ! ايه زيدوها فكركم ! علاه واش نتوما لي كاترحمو العباد و لا كيفاش ؟ من انتم؟
كان غايقوليكم ديك الرحمة ديالكم زيدوها فبلدانكم لي كاتعيش وسط الحروب و الدم
الرحمة ديالكم زيدوها فبلاداتكم لي تتذيل الأمم من ناحية العلم
كان غايقوليكم الرحمة ديالكم زيدوها فسبيطاراتكم لي كايموتو فيهم الناس كي البخوش
الرحمة ديالكم زيدوها فيكم !
فزگوها و بخرو بيها
اما هوا مرحووووووووم و فايت الرحمة لهيه ! راحماه خدمتو ! و راحماه المساهمة ديالو العلمية ! و راحمينو كتوباتو لي كتب ! و راحمينو طلبتو لي قراهم فأعتى الجامعات ! و راحماه قوتو و الكوراج ديالو لي خلاه يتحدى الاعاقة و يعطينا شي حاجة !!!
أما نتوما لاش صالحين ؟
شفتي نعرفك راجل آ البخوشة و نيت من “خير أمة أخرجت للناس” ! هي تنتج تيليفونك بوحدك ! و البروسيسور ديال البيسي ديالك بوحدك و الموطور ديال طوموبيلتك بوحدك !
و راه قولوها المغاربة شحال هادي : المكسي بديال الناس عريان نتوما راكم فتو العرا لهيه ! و لاحيدنا ليكم بيسيات الكفار و سيارات الكفار و كليمازورات الكفار و بوطات الكفار وا غاترجعو تسافطو الرسائل مع الحمام و تمسحو خرازيكم بالكرت ! و غاترجعو حفاة عراة !
“نفق ملحد” قالك
نتا راك عايش في الحياة و نافق ، ميت ! هوا راه بالكروسة قرا و عرف و انتج و تجوج و ولد وربى و خلا للتاريخ باش يذكرو ! و نتا بصحتك بيديك برجليك بفمك خانز هكاك و محسوب مع الميتين !
” لا تجوز الرحمة على كافر”
وا جي نحيدو لمك الدوايات ديال الكفار و الفاكسانات ديال الكفار و اجهزة السكانير و ليغيم و الراديوات ديال السدر و شوف لاما يرجع ياكل مك الطاعون ! و يبانو فيك الامراض لي نقارضو هادي آلاف السنين !

هادشي كامل علاش ؟ حيت الاسلامي بياع الوهم و الخرافة ! كايبني حياتو و المنطق ديالو على جملة وحدة ” نحن خير أمة اخرجت للناس” و كفى ! هنا كايحبس العقل ديالو عن التفكير! و كايشوف راسو احسن من كلشي ! آه واخا تقوليه وااا الخرزي راك موسخ كايقولك ” انا احسن من كلشي”
وا الخرزي وا راك ماكاتنتج والو ! كايقولك ولكن ” انا احسن من كلشي”
وا الخرزي ” وا راك فاش كاتبغي داوا كاتمشي لمستشفيات الكفار” كايقولك ” ليه و لكن انا احسن من كلشي”
وا الخرزي ” راك نهار كاتحس براسك مستهدف فبلادك و كاتقلب على الهروب كاتقصد السفارة ديال الكفار و لا بلدان الكفار” كايشوف فيك ! كايبقا يشوف ” كاتقول واااااو ! أخيرا فهم ! حتى كاتبغي تفرح و كايجاوبك ” اه ! و لكن انا احسن من كلشي”
الخرزي ! كايشوف راسو أحسن من كلشي واخا هوا فزك الترتيب ديال كلشي!

ستيفن هاوكينغ مات و التاريخ غايذكرو كواحد من العظماء و غايقراو عليه ولاد ولاد ولادك كعالم كبير ( عالم ديال بصح ماشي عالم ديال أحكام الصراط وماجاورهما) ! و نتا باش غايذكر دين امك التاريخ ؟ كأكبر خراي ؟ كأعظم ناشر للظلامية ؟ كواحد من الأصوليين ؟ وا الجيران فالحومة و موحال يذكروك !
خلاها الهناوات
هانتا متي و من بعد ؟‌كاتحكم فالنقض و الابرام تا ؟
موت مانعزيوش فيك حنا گاع !