هناء ابو علي كود كازا//

لهضرة دارت بزاف على كيفاش تم تصوير شخصية “الشيخة” بحال اللي كيشوفها السلفي العمري اللي عندو نوع من الاحتقار عليها وخا أن هاد الشخصية تدارت فهاد المسلسل باش ماشي تكون هي البطلة كلن تصورات بطريقة انتهازية.

الممثل محمد الشوبي قال فتدوينة نشرها على صفحتو على الفايسبوك فاتن اليوسفي كاتبة سيناريو مسلسل “لمكتوب”٬ واعتابر انها دافعات على التصور اللي عند متطرفين بحال هاداك انس العمري “في الأخير انتصرت لثقافتك وإقصائك الممنهج السيدة يوسفي واعطتك مسوغا لتضرب كل شيخات العالم لو تريثت أيها الكائن اليوتوبي قليلا لعانقت السيناريست وذهبتما في رحلة اقصاءات أخرى. دافع الكل وهاجم الكل لأن المدافع والمهاجم في اعرافنا هو نفس الشخص لأننا بفضلكم ننعم في السكيزوفرينيا المزمنة وما كل هذا يا شيخنا وشيختنا الكاتبة إلا لمكتوب”.

“كود” سولات المعنية بالامر السيناريست فاتن اليوسفي. فكانت هادي اجوبتها.
“من لول القصة ما قلناش غاديين ندافعو على شي شخصية فالمسلسل. درنا بورتريهات لشخصيات كتحرك فمجتمع وكأثر بيه وكتغير وخلينا للمشاهد هو اللي يحكم” توضح اليوسفي فحوارها مع “كود” وزادت وضحات “فهاد المسلسل ما كاين لا بطلات ولا أبطال وكولشي فيه يتغير”.

“الشيخة واجهات دربها وجيرنها وحتى راجل بنتها حقاش كانت كتدير هاد المهنة بحب. كانت مبلية بيها بلية زوينة” يشرح كاتبة سيناريو “لمكتوب” ل”كود”٬ واكدات باللي “الشيخة حليمة =ادت الدور دنيا بوطازوت= بحال أي أم كانت باغية تضمن مستقبل بنتها. جاتها الفرصة مع عمر المعطاوي =ادى الدور الممثل أمين الناجي=. ومن بعد هاد الزواج ديال المصلحة داك الشيخة واجهات كره آخر من طرف الباتول= ادت الدور مريم الزعيمي”. تضيف السيناريست فاتن اليوسفي لـ”كود”.

السيناريست وضحات هاد النقطة فحوارها مع “كود” بحديثها على التحول اللي وقع فشخصية الشيخة حليمة بعد ما تشدات فالحبس ظلما وباش ضحات بأحسن صديقتها”. ودافعات على النهاية “حليمة وبنتها انتاقمو. خداو السلطة من عائلة مبنية على لكذوب. هاد الشي بان فالورث اللي خداتو فاطمة الخدامة”

وعادت السيناريست فاتن اليوسفي لتؤكد ل”كود” أن “هاد القصة الهدف منها ماشي هو تلميع الصورة ديال فئة مجتمعية”.

وتابعت فحوارها مع “كود”: “الشيخة شخصية تستاهل نعالجو موضوعها بهاد الطريقة وحنا ما محتاجينش باش نلمعو الصورة ديالها أو نهضرو عليها بطريقة إيجابية حقاش في الأصل هي ممحتاجاناش فهادشي”.

وترى فاتن فتصريحها ل”كود” أن أكثر عدالة في ما يخص شخصية الشيخة هو معالجة الموضوع ديالها كشخصية كاملة مكمولة، مضيفة ل”كود”: “ما كنديروش التمييز ومكانديروش التعميم وكاع الناس اللي كيديرو هادشي راهم غالطين. كل انتقاد راه بناء ومزيان. والشيخة ما محتاجاش ندافع عليها. باغية غير نقبلوها كمواطنة عادية بلا أحكام مسبقة”.

غير ان الممثل محمد الشوبي كان عندو رأي اخر٬ فتدوينتو اللي دكرناها فالسابق اضاف “الشيخ والشيخة وكما يقول الفقه المالكي الأمور بخواتمها لو تريثت أيها الشيخ إلى نهاية المسلسل لو لم تأخذك حمأة البوز لتركب على موضوع شائك لو سكتت قليلا على قناتك التي تدر عليك أموالا إضافية لو كنت حقيقة شيخا جليلا ونحن المالكية نعرف الفرق بين الشيخ الجليل والذي هو من يتريث في الأحكام ويأخذ الحكمة من ناصيتها وبين المدعي المشيخة بتزويق الكلام بالخطاب الديني السطحي”.

وخاطب داك المتطرف العمري: “لو انتبهت للجنس الدرامي الذي انتقدت فيه حلقة واحدة لا تسمن ولا تغني من جهل بالكتابة الدرامية للمسلسلات لو ولو ولو ولو لشاهدت في آخر حلقة أن فاتن يوسفي تعوم في نفس الجب الذي سقطت فيه، هي أيضا أدانت الشيخة، وضعتها وضيعة تؤمن في الانتقام من مجتمع ينبذها بكل خسة افتعال حمل وجلب طفل من خارج مؤسسة الزواج والحمل لتضرب الأخلاق والقيم والأعراف، وتجعل من ذلك الطفل حاملا لمشعل انتقامها من عائلة احتقرت إختيار ابنتها لتكون واحدة من بين أعضاء عائلة المعطاوي”.