عفراء علوي محمدي- كود//

مع اتساع البؤرة الصناعية لفيروس كورونا المستجد فمنطقة لالة ميمونة فقنيطرة، وتسجيل أزيد من 450 إصابة اليوم، الصحافيين عياو يتصلو بمسؤولين فالوزارة، وفالمديرية الجهوية لجهة الرباط سلا، بالإضافة لمندوبية الصحة فالقنيطرة، بدون تلقي أي جواب.

مجموعة من الصحافيين عبرو على الامتعاض ديالهم من هذ الضعف فالتواصل فهذ الفترة الحساسة، خصوصا وأن المغرب اليوم سجل أكبر عدد ديال الإصابات اليوم، وهذشي منذ ظهور الوباء فبداية شهر مارس، ومن ضمن هؤلاء الصحافيين الصحافي بإذاعة ميد راديو، رضوان الرمضاني، اللي قال فحاسبو على “فيسبوك”: “ما يجيش شي واحد دابا يقولي التهويل ونشر الأخبار غير الدقيقة، بما أنكم لا تتواصلون ما كنتسناوش…”.

من جهتهم، مجموعة من الصحافيين من منابر مختلفة عبرو، فمجموعة تطبيق “واتساب” الخاصة بتواصل الوزارة مع الصحافيين، (عبرو) على الغضب ديالهم من هذ الضعف التواصلي، وتساءلو علاش ما كيجاوبهم حد على اتصالاتهم، وعلاش ماكيردوش المسؤولين على الأسئلة اللي كيطرحوها فالمجموعة.

غضب الصحافيين واستنكارهم لعدم تواصل الوزارة معاهم ماشي يالاه ولا، حيت من مدة طويلة وهوما كيتشكاو من هذ المسألة، لكن اليوم كان احتجاجهم قوي كثر، الشي اللي خلى شي وحدين يخرجو من المجموعة الإعلامية، والبعض الآخر يعلن على مقاطعتو للتواصل مع الوزارة فخطرة.