كود سلا//

يبدو أن حزب الاستقلال مغاديش يخرج من الحروب الداخلية. هاذ السيمانة الشبيبة طردات واحد من أعضاء المجلس الوطني للشبيبة الاستقلالية وعضوية اللجنة المركزية اللي كيمثل الصحرا، وبدا القصف فكل الاتجاهات.

من تجليات هاذ الصراعات، هو خروج بزاف ديال الاستقلاليين  بتدوينات  فالفايس للتضامن مع خديجة الزومي.

علاش هاذ التضامن، حيث العضو المطرود غالي لطيف خرج كيفضح تحريض الكاتب العام عثمان الطرمونية اللي حرضوا يهاجم خديجة الزومي ويسبها، و تحدى الكاتب العام يخرج ينفي لانه يتوفر على دليل الإدانة.

هاذ الشي تفرش ملي هذاك اللي تطرد صور فيديو كيتحدى عثمان الطرمونية اللي واقف وراء حملات التشهير و السب وبالدليل.

علا مكيبان أن تيار شباط اللي خسر المعركة التنظيمية فالمؤتمر الاخير كيحرك بعض الأعضاء لإثارة الصراعات الهامشية لخلط الاوراق.

هاذ التيار كيعتبر الزومي اكبر الرابحين حيث هي الوحيدة اللي حافظات على مكانتها بعد الإطاحة بشباط، وخاصها تاكل لعصى.

هاذ التشيار اللي خدام على أشده فحزب الاستقلال كيخفي حتى صراع المواقع اللي كتحركوا صراعات تشكيل اللائحة الوطنية للشباب فانتخابات 2021.