هشام أعناجي ـ كود الرباط//
اتهم محمد الكاتب العام للفيدرالية المغربية لأرباب المخابز والحلويات، بعض مصانع المطاحن بـ”انتاج دقيق فاسد”.
لكن الاتهام اعتبره مسؤول بالفيدرالية الوطنية للمطاحن، بأنه “كلام غير مسؤول وغير ناضج صرح به شخص لا يتوفر على الأهلية العلمية والتقنية للحديث عن الدقيق المغربي”.
محمد القيري، الكاتب العام للفيدرالية المغربية لأرباب المخابز والحلويات، صرح لـ”كود” بلي الدقيق المستعمل في إنتاج الخبز مكيصلحش حتى للعلف اللي كيتعطا لبهايم.
الفيدرالية كتهم مباشرة المطاحن (ومنهم الفدرالية البينمهنية لأنشطة الحبوب)، اللي كتسيرها الباطرونا، بالضلوح في انتاج “الدقيق الفاسد”.
مسؤول في فيدرالية المطاحن قال لـ”كود” :”حاليا هناك 160 مطحنة مؤهلة ومرخصة من طرف المكتب الوطني للسلامة الصحية، نتحداو هاد الشخص اللي كيتهمنا يعطينا مطحنة وحدة ويعطينا اشمن مادة فاسدة”.
وشدد المسؤول لـ”كود” :”كاينا 7 ألف مطحنة فالمغرب، وغير شكون كيمثل هاد الشخص اللي كيتهم المطاحن، واش عندو شرعية تمثيلية وقانونية باش يقول هاد الاتهام الكبير اللي كيهم الأمن الغذائي المغربي”.
الكاتب العام للفيدرالية المغربية لأرباب المخابز يوضح لـ”كود” بلي هاد الدقيق مصالحش وكيزيدو ليه فالمخابز بعض المكونات باش يولي صالح للتغذية.
هاد التصريح رد عليه المسؤول في فيدرالية المطاحن بالقول :”الدقيق مادة حيوية تخضع لعملية خاصة في الانتاج، وكيخضع للتخزين في ظروف خاصة باش ميخسرش، وكاين مختبرات علمية كتشرف على العملية كلها، إضافة إلى المراقبة ديال المكتب الوطني للسلامة الصحية”.
وتابع ذات المصدر :”الجهة الوحيدة اللي تقول هذا دقيق فاسد أو غير فاسد هو المكتب الوطني للسلامة الصحية”.
وشدد المسؤول في الباطرونا لـ”كود” :”الدقيق مادة فلاحية حية، وحشوما نقولو كلام يستهدف الأمن الغذائي المغربي، وحنا غانمشيو للقضاء لأن هاد التصريحات خطيرة وكتشكك في الخبراء والتقنيين والمصالح التابعة للدولة”.
القميري الكاتب العام لفيدرالية المخابز، يقول بأن “غاديرو مقاطعة منتوجات بعض المطاحن الصناعية”.
يشار إلى أن المهمة الاستطلاعية المؤقتة للوقوف على عمليات تدبير وتوزيع الدقيق وكذا الانظمة الحالية للدعم الموجه لهذه المادة، تبلوكات بسبب صفقة سياسية دارها قيادي فالبام كان رئيس المهمة قبل ما يقبرها وتمشي للرفوف.
