مصطفى الشاذلي – كود سبور//

عبد الرزاق حمد الله، اللاعب المغربي في صفوف النصر السعودي جابها ف راسو، بعدما منع من مغادرة السعودي، بسبب المضاربة ديالو مع بوليسية ف مطار جدة.

السخونية ديال الراس خلات حمد الله ف أزمة حقيقية مع فرقتو وكذلك مع الأمن العسكري ف السعودية اللي دخل على الخط.

حمد الله دابز مع بوليسية لحقاش ما قبلش مراتو الحامل دوز من سكانير باش ما يأثرش على الجنين. ما تحكمش ف أعصابو كيف ديما.

هاد القضية اخدت إبعادا خطيرا، بعدما رفضات الموظفة، اللي هي برتبة رقيب تنازل على شكايتها، الشي، لي خلا البوليس يمنع حمد الله يغادر السعودية وحجز جواز سفره.

واكدت انها ما غاديش تنازل واخا مساعي الصلح بين الطرفين. التحقيقات مازال مستمرة ومن المنتظر إحالة حمد الله على النيابة العامة.

ما شي اول مرة كيدير فيها حمد الله المشاكل سبق ليه دابز مع يونس بلهندة في الكونصونتراسيون ديال المنتخب قبل كأس إفريقيا، ودخل في ملاسنات مع حارس مرمى وآخرها فاش رفض يعطي لولد بلادو نور الدين أمرابط يشوت بيلانتي واخا زاوگو، وأكثر من ذلك تعمد يستفز مصطفى حجي في تصريحات صحافية. باختصار السيد تفرعن بزاف وخاص لي بقوقفو واخا ما بغينالوش هاد التبهديلة في السعودية.

على هاد القبال هيرفي رونار، مدرب المنتخب المغربي السابق كان عندو الحق فاش ما صوقليهش من غادر المنتخب قبل الكان وماكانش كايعيط عليه حيت عارفو أنه ماشي منضبط ومتخضر في سلوكه وأكثر من ذلك مازال هاوي ف دماغو.