وأي وحدة احتجت على الكلام الميزوجيني لي كتبو صاحبهم كيطردوها من المجموعة بل مكيكتفيوش بذلك بل كيطالبو منها تعتذر على الإختلاف ديالها مع المضمون المتخلف لكلام الدكتور، لي قال أن النساء الطبيبات خاصهم ميخدموش فظروف الوباء ويخليو غير الرجال، السيد بغا يجمع الفلوس بوحدو وزاد قال ان اصلا عمل المرأة ماشي شرعي، دابا هذا واش كلام يقولو طبيب قاري سنوات من بعد الباك؟
وملي ناضو البعض يحتجو طردهوم من المجموعة واتهموهم بالتسريب ديال التدوينة وكأن المشكل هو التسريب وماشي المضمون لي كتفوح منو رائحة التحريض على النساء وعندو حمولة فيها تمييز تجاههن.
الأصدقاء ديال الدكتور مول التدوينة قالو صاحبهم غير ضاحك، معارفينش بلي مسلسلات وافلام وبرامج إذاعية توقفوا وماليها طردو بسبب كلام أقل من هداك.
وفنفس المجموعة ديال الاطباء يا حسرة، استهزؤو بصورة فيها ناس باين من البالكون أنهم فحي شعبي ناشرين الكمامات، الناس كتموت بالجوع والبلاد واقفة وفرمليات فالصف الأمامي لمكافحة الوباء كيرشو لالكول على الكمامات البروفيسيونيل لأنها مكافياش وهوما جالسين يكركرو، عوض ينوضو يعاونو البلاد ويعطيو الكمامات لي سادين عليها فالعيادات ديالكم ويتطوعو فالسبيطارات.
فين ديك هيئة الأطباء لي كيطلعو للأجهزة التقريرية والتنفيذية بربعمية صوت ومحتاكرينها وكيحاربو الشباب ميطلعوش، مالها ما تقدم الدعم، بدل ما دايرين مجموعة يضحكو فيها على أوضاع المغاربة وينفثو فيها أفكارهم الميزوجنية المتخلفة.