عفراء علوي محمدي- كود//

قررات إدارة قناة ميدي 1 تيفي تجري على الصحافي يوسف بلهيسي بصفة نهائية، واللي كان كيشتغل كمقدم لنشرة الأخبار، وكان نائب لرئيس المكتب النقابي ديال الاتحاد المغربي للشغل فالقناة.

وحسب مصدر من النقابة المذكورة، فتم بالإضافة لهذشي الحد من صلاحيات عزيز فتحي، رئيس التحرير فالقناة، ومنسق المكتب النقابي، بالإضافة لهشام فوزي، سكرتير النقابة، اللي خدا كونجي هذي أيام بسبب المرض ديال الوالد ديالو فكازا.

وحسب ما وصل لـ “كود” من معطيات، فتم كذلك وقف التعاقد مع صحافي فرونكفوني جاي من بلجيكا، سميتو هشام الغزواني، ومنين سمعات واحد الصحافية جاية من دولة إفريقية هذ القرارات المفاجأة اللي كتاخد القناة، دخلات عندهم للإدارة، وطلبات باش يعلموها بتوقيفها بكري قبل ما تسجل ولادها فالمدرسة.