فحال گاع عشاق الصنادل د الجلد ! مول الفوقية و صحابو كايتخايلو بلي كاين شي مخطط ضد الاسلام و المسلمين الهدف ديالو هوا القضاء عليهم ! و بلي الماسونية كاتستاغل كورونا باش تطبق الخطة الجهنمية الگراندايزرية البوكيمونية التيليتوبيزية للقضاء على الدين و بلي منع صلاة العيد داخل فهاد المخطط الجهنمي لي عاق بيه غا مول الفوقية و صحابو ! واش سمعتي آ الماسونية ؟ صافي راه تفرشتي عاق بيك الديتيگتيڤ مول الفوقية نوضي على سلامتك !

مساليين قبهم هاد الناس ! كايصحابهم راه غير بوحدهم لي مسلمين فالمغرب !
گاع المغاربة مسلمين آ الاخوان !الكسابة لي دابا فالسوق مسلمين و الشناقة مسلمين و الكليان مسلمين !  الاغلبية الساحقة راه سمعو القرار ديال المنع د صلاة العيد و ميكو! تقبلوه بصدر رحب! كاين لي ماتسوقش ليه گاع حيت ماعمرو اركعها !! المسألة مسألة أولويات و بغا مول الفوقية و لا كره المواطن المغربي حاليا مقاتل باش يشري العيد و الحاجة الوحيدة لي يمكن تعكر الفرحة ديالو هي مايلقاش شي حولي مليح بالثمن لي بغا أما الباقي غي روايات! المغربي مشغول دابا كايسول واش كاين شي رخا ؟ و بشحال شرا جارو ؟ و مراتو مقاتلة باش تشري العطرية و السفافد و كايساينو العيد باش يخلقو الاجواء و يشويو بولفاف !و الدراري كايجمعو العواد باش يشوطو الريوس ! العيد الكبير هوا الشوا و بولفاف و الكتف و القطبان مع العائلة نعام آ سيدي ! هذا هوا العيد بالنسبة للاغلبية الساحقة ديال المغاربة و صلاة العيد كانت هوا هاداك ماكانتش هي هاديك راه فاهمين الظروف لي كاتمر بيها البلاد و عندهم الاولوية دابا هي توفير مصاريف العيد و العطلة و موراها الدخول المدرسي و بالنسبة للصلاة، الانسان لي باغي يعبد الله كايعبدو فدارو ! هذا طبعا ماكايعنيش انه المغاربة ماشي روحانيين ! لا المغاربة عندهم جانب روحاني كبير بزاف ولكن ماشي كيما بغا مول الفوقية!

سهام البارودي – كود//

المغاربة واخا سنين ديال محاولة التدعشيش ديالهم وواخا العقلية المحافظة لي عند اغلبهم ولكن فلداخل ديالهم شعب واعي بالاولويات ! شعب كايطبق المقولة ديال شوية لربي شوية لعبدو ! سمع مزيان هاد “شوية لربي” هادي كاتلخص العقلية ديال بزاف ديال الناس ! فاش كايقوليك بنادم ” شوية لربي” راه كايرفض ضمنيا انه يعطي “كلشي لربي” عارف بلي الحياة فيها ربي و فيها “عبدو” فيها الجزء الروحاني و فيها الجزء المادي ! و قابل انه يعطي شوية هنا و شوية لهيه فيفتي فيفتي !

مول الفوقية مسيكين ماكرهش يشوف شي انتفاضة و المظاهرات و الملايين خارجين كايغوتو على صلاة العيد و لكن طبعا هادشي مستحيل حيت الاغلبية ماشي هادي هي الاولوية الحالية ديالو ! يقدر يخرج مول الفوقية ! يخرجو بضعة من صحابو فبعض الاحياء المتفرقة هنا و هناك و لي معروفة بأنها عامرة باللحايا و صحاب قال الله قال الرسول ! ولكن بصفة عامة المغربي مامسوقش و ماعندوش مع هاد المحاولات البهلوانية لإثبات الذات !

مسكين مول الفوقية ! عايش فعالم بوحدو ! كايتألم حيت المغاربة ماكايشبهوش ليه ! مامسوقينش لداكشي لي هوا محروق عليه ! مشغولين بأولويات هوما سطروها لراسهم ! المغربي باغي يعيش مزيان ! ياكل مزيان ! يسكن ! يقري ولادو و يكون عندو باش يداوا ! باسطا ! من غير هادشي راه بالنسبة ليه كلشي دايز !