وكالات //

روائية ميريكانية مولات بلوكَ بعنوان “هاكيفاش تصفيها لراجلك” متهمة بقتل رجلها ف2018 بالقرطاس حققات انتصار قانوني مؤخرا بعدما قرر قاضي فميريكان مايعتابرش البلوكَ كدليل ضدها.

ومن جهتها صحيفة “The Times” البريطانية قالت أن نانسي بروفي (Nancy Crampton Brophy) متهمة بقتل راجلها بعدما تيرات فيه جوج ديال المرات فظهرو، ومرة بعدما طاح على الأرض وهو كيموت، وهادشي كامل على قبل الفلوس.

وقالت السلطات بللي كانو لقاو جثة راجلها دانيال بروفي، 63 عام، نهار 2 يونيو 2018، مليوحة فمعهد أوريكَون للطبخ، اللي خدام فيه كأستاذ.

المحكامة ديال الروائية نانسي بروفي مازال مستمرة فميريكان، بسباب أنه بانت شهادة أخرى ديال صاحبتها فالحبس اللي قالت ليهم أنها (نانسي) اعتارفت ليها بجريمة القتل.