كريم الشركي – كود //
مازال الحديث عن نقل قاعدة “روتا” الامريكية من اسبانيا للمغرب، مخربق الاسبان لي شعلات فيهم العافية مع قرب انتهاء الكونترا لي بين اسبانيا والميريكان عل هاد القاعدة، واللي بدات فشهر ماي 1988، وغاتسالي ف22 مايو من هاد العام، واللي مازال لحدود الساعة ماتمش تجديدها.
وحسب موقع “ديفينسا اي أبياثيون” (الدفاع والطيران)، فمن لحوايج لي مخلاتش الكونترا تتجدد هو حزب بوديموس لي مشارك فالحكومة، واللي عندو عداء مع الميريكان وتقارب مع روسيا وايران، وهادشي كيخلي الميريكانيين ميسينيوش الكونترا، وفحالة التجديد غاتكون مهمة بيدرو سانشيث صعيبة.
لكن حسب الموقع، فالهضرة على نقل هاد القاعدة للمغرب، مامنهاش، وماشاداش، حقاش هاد القاعدة كتعتابر قاعدة مهمة بزاف لحلف الناتو والاتحاد الاوروبي، وهي لي عوضات عمليات نورث وود ليكانت فيها بريطانيا لي خرجات دابا من الاتحاد الاوروبي.
وزاد الموقع أن وسائل اعلام مغربية كانت قالت أنه كاين اتفاق بين ميريكان والمغرب لنقل القاعدة ووضعها في القصر الصغير، لكن سفارة ميريكان فالرباط، وأيضا الحكومة المغربية كذبو هادشي وقالو ماكاينش منو.
وجات موراهم مواقع مغربية أخرى من 360 واسلوعية الايام ونسبو خبر لمصادر مجهولة، قالو أن هاد المصدر المجهول أكد ان القاعدة غاتكون فالصحراء المغربية فطانطان.
الموقع كذب هادشي لعدة اسباب، وقال ان أولها هي كون طانطان مكايناش فالصحراء المتنازع عليها، وثانيها ماكاينش شي ميناء كبير يصلاح يكون واجهة بحرية للقاعدة، وثالثا راه التكذيب ديال الحكومة المغربية وديال سفارة امريكا، كينفي وجود الصفقة من الاصل.
