عمر المزين – كود //

علمت “كَود” أن عدد التلامذ المغاربة اللي هربو فسلوفاكيا ارتافع لـ8 تلامذ، بعدما تزادو جوج آخرين فالساعات القليلة قبل عودتهم إلى أرض الوطن.

وحسب المعلومات التي حصلت عليها “كَود”، فإن مصير هاد التلامذ اللي مشاو يشاركو فالبطولة العالمية ديال العدو الريفي المدرسي باقي مامعروفش. وبدا المشكل  مللي هربو 6 فالأيام اللولة من وصولهم إلى سلوفاكيا.

وقالت مصادر “كَود” أن هروب هاد جوج تلامذ اللخرين جا بعدما استغلوا انشغال المؤطرين اللي معاهوم فتنظيم عملية نقل زملائهم صوب المطار للعودة إلى أرض الوطن.

وحسب المعلومات التي تتوفر عليها “كَود”، فإن التلامذ المعنيين “من المؤكد بللي كانو موجدين لهاد العملية ديال الهروب الجماعي من سلوفاكيا”، وقالت مصادرنا بللي يتوقع أنهم مشاو للطاليان أو ربما وجهة أخرى قريبة من دولة سلوفاكيا.

وكان واحد من الكَروب ديال التلامذ اللي هربو فاللول نشر شي بوسط فالكونط ديالو فموقع “أنستكَرام”، ومعاه التصويرة ديالو كيبان فيها الباسبور وحاط راية الطاليان ودار تصويرة أخرى حدا البحر.

هاد التلامذ اللي مشاو يشاركو فالبطولة العالمية المدرسية للعدو الريفي رجعو نهار الجمعة الفايتة للمغرب. وصدمة عايشها الوفد اللي متكون من 26 واحد، من بينهم رئيس الوفد المرافق والمؤطر لهاد التلامذ.

ومن جهة أخرى لم تستبعد مصادر “كَود” أن تكون بعض العائلات ديال هاد التلامذ اللي هربو، أو على الأقل أفراد منها،  على علم بكلشي من اللول.

وكان هؤلاء التلاميذ القاصرين قد قرروا الفرار من الفندق اللي نازلين فيه ومشاو طلعو فالتران مع الـ5 ديال الصباح وسمحو فالباسبورات ديالهم عند المرافق اللي معاهم.