عفراء علوي محمدي- كود//
لونصاو النشطاء على مواقع التواصل الاجتماعي، فهذ الايام، هاشتاكَ جديد سميتو #خليه_يخناز، من بعد ما غلاو أسعار الحوت هذ رمضان.
وفمنشورات كثيرة، عبرو رواد الفضاء الافتراضي على الاستياء ديالهم من غلاء الأسعار ديال الحوت بجميع انواعو، حتى الرخيص، بحيث بعض المناطق وصل ثمن السردين ل20 درهم.
فهذ الصدد، قال بوعزة الخراطي، رئيس الجامعة المغربية لحقوق المستهلك، أن السبب فعذشي هو تغيير العادات الاستهلاكية ديال المغاربة، اللي ولاو يدخلو فيهم الشهيوات كثر مع رمضان، وبتالي ولا كاين إقبال على جميع أنواع الأسماك، وكاين عليها.
وشحال ما كان الإقبال كثير شحال ما ارتفع الثمن فالسوق، وفاش كيقوى الطلب كينخفض العرض وكيرتفع الثمن، حسب ما قال الخراطي، ونبه الناس باش مايشريوش كلشي فدقة وحدة، حيت السلعة موجودة والخير موجود، لكن فالوقت فاش كنمشيو كاملين فوقت واحد، بالطبع التاجر غيبغي يربح، كيزيد فالثمن.
السبب الرئيسي الثاني اللي كيشوف الخراطي أنه سبب فالزيادة هو “السماسرة والوسطاء اللي كاينين فالقطاع، لأنه لا يعقل مثلا السردين كيدير 3 دراهم فالمرسة، وكيوصل ب20 أو 25 درهم للمستهلك، كيتزاد عليه لاكَلاس فقط ولاكَلاس كتدار ليه بعض المرات فالبحر، فاللي كيتزادو هوما الوسطاء، لغياب نظام السوق المغربي للمنتوجات الاستهلاكية، وماكاينش شي مؤسسة تعنى بتتبع مسار المنتوجات الغذائية”.
وحمل الخراطي المسؤولية للحكومة فهذ الغلاء اللي كاين فالحوت، وحتى الفواكه، وقال انه ماخصش المقاطعة دالحوت لان التاجر كيتضر، لكن مساءلة الحكومة اللي مامراقباش السوق.