عفراء علوي محمدي- كود//

قررات الفيدرالية الوطنية للنقل السياحي فالمغرب تدخل فإضراب مفتوح ابتداء من 13 غشت الجاي، فمختلف الجهات والأقاليم، بعدما تكلمات مع السلطات المسؤولة على الوضعية اللي كتعيشها وماتوصلات لحتى شي حل.

مهنيو النقل السياحي هذ العام تكرفصو بزاف بسباب فيروس كورونا المستجد، وكيقولو أنهم واخا تكلمو مع “الجهات المسؤولة” فمناسبات عدة، لكن ماتسوق ليهم حد.

الفيدرالية دالنقل السياحي أكدات، فبلاغ ليها صدراتو اليوم الأربعاء، وحصلات عليه “كود”، أنها سبق ليها تواصلات مع المسؤولين من أجل إيجاد حلول جذرية لإنقاذ القطاع، وضمان استمرارية اشتغالو، لكن كتتفاجأ بعدم التزام هذ الجهات بأجرأة مضامين الملف المطلبي ديالها.

وعتبرات الفيديرالية المسؤولين هما السبب فتبعات ونتاىج هذ الحركة الاحتجاجية اللي دارت.