كود طنجة ///
الاحد اللي فات 14 ابريل مع التسعود دالصباح خرج من ميناء طريفة باطو فيه عدد من لمغاربة اللي دوزو عطلة العيد فالكوسطا ديل صول. كان منهم نائب رئيس الباطرونا مهدي التازي. وصل الباطو فحدود التسعود التوقيت المغربي =فرق ساعة بينا بين الصبليون= لميناء طنجة المتوسط.
هنا غادي يعيشو اللي جاو حالة غريبة. الديوانيين كيفليو الطونوبيلات. كيديرو ما بين 40 دقيقة وساعة فكل وحدة وفللخر كيجي حتى البوليس تماك يدير شي بركة. كيعطلو اللي فاقو بكري باش يدخلو ويوصلو لديورهم بنهار ويتفاداو زحام الاحد مع عطلة العيد الطرقان كانو عامرين.
الديوانة ومعاهم البوليس اللي قلب من بعد كانو زايدين فيه. كيفاش ميناء بحال طنجة المدينة ما عندوش سكانير كافي يعرف اي حاجة فالطونوبيلات الى كان خوف من تهريب حوايج. علاش ما يديروش بحال الصبليون. باش تدخل عندهم لميناء طريفة او الخزيرات ما كيعطلوش القضية. كيفاش الدولة دايرة شرطة الحدود فالباطو ماش لمغاربة ما يتعطلوش ونفس الدولة دايرة ديوانة تشدك ساعة
هاد الشي كثر. شفنا مطار المنارة بمراكش ايام العيد عامر حقاش البوليس فالحدود كيتعطل مع كل واحد. فكاع مطارات العالم ما كيفوتوش معاك 2 دقائق ايلى تعطلو بزاف بزاف. اما ايلى كنتي ولد لبلاد يقدرو يدوزو معاك 10 ثواني او اقل وهنا ايلى دخلتي لبلادك. عندك باسبور اجنبي تتعطل. عندك باسبور مغربي تتعطل. لهيه فاوربا تقريبا ما كيطبعوش ديما لمواطنيهم. هنا ضروري يدخل للكمبوتر. يشوف. يسكاني. يتسنى تطلع سميتك. يطبع ليك.
بهاد الشي راه ما غاديش يجيو عندك سياح فالمونديال. علاش مطاراتنا لحد الان ما فيهمش تجارب لاوطو كونتور. دوز على آلة ودوز باسبور ديالك وتفتح ليك الآلة تخرج فحالك. هاد الشي كاين فدول الخليج فاوربا. هادو كلهم عندهم هم امني بحالنا ولكن كتكون الامور سلسة. حنا عندنا اجتهاد بوحدو فالعالم يمكن. حتى يطبع ليك البوليس وكيجي بوليسي اخر كيراقب ليك واش كاينة الطبعة. هاد الشي فالدخلة والخرجة
نرجعو لميناء طنجة ونائب الباطرونا داك التازي. من حقو يمشي فين ما بغى يدوز عطلتو. لكن كنائب للباطرونا من الواجب عليه يدافع على سلاسة اكثر فموانئنا ومطاراتنا. راه انتخب فهاد المنصب لهاد الشي. تبدليتو وتبديلة عدد من لمغاربة فميناء طنجة من قبل الديوانة خاصها تحرك فيه النفس ايلى عندو٬ خاصو يكون محامي هادوك اللي تسخسخو معاه.
هاد الشي خاصو يتبدل. موحالش يرافع امثال التازي باش يتغير. خاص السياسيين يطرحوه فالنقاش العمومي. الا الى كانت الديوانة من المقدسات بلا خبارنا