عفراء علوي محمدي- كود//

قررات محكمة الاستئناف فمراكش تأجيل ملف البيدوفيل الكويتي، اللي اغتصب قاصر عندها 15 سنة، حتى ل18 من شهر غشت جاي.

المتهم، اللي عندو 24 سنة، ماعاودش حضر للجلسات ديال المحاكمة ديالو منهار خوا المغرب بعدما تدخلات السفارة ديال البلاد ديالو باش مايبقاش مشدود، وضمنات الحضور ديالو فالجلسات بعدما تتم متابعتو فحالة سراح.

وطالبات الجمعية المغربية لحقوق الإنسان – فرع مراكش، اللي منصبة راسها طرف مدني للدفاع عن الطفلة، على اعتبار أن هذ الحادث كيقيس الطفولة بصفة عامة وماشي غير الضحية، (طالبات) الدولة باش تتدخل وتطلب تسليم المشتبه فيه باش يحضر قدام المحكمة.

كيف طالبات الجمعية، فبلاغها دائما، لوضع حد للإفلات من العقاب لمقترفي بحال هذ الجرائم، وطالبات من الدولة الكويتية تلتزم بوعودها وتسلم المتهم.