عفراء علوي محمدي- كود//

طالبات فدرالية الصناعات الثقافية والإبداعية بضرورة إعفاء الشركات اللي كتشتغل فمجال الصناعات الثقافية والإبداعية والتظاهرات، لمدة 9 أشهر، من المستحقات الضريبية على الدخل، والصندوق الوطني للضمان الاجتماعي، والتغطية الصحية الإجبارية، وهذشي من أبريل إلى دجنبر.

واعتبرات الفدرالية، فبلاغ ليها حصلات عليه “كود”، بللي الفنانين والمبدعين كلاو العصا فظل جائحة فيروس كورونا المستجد، خصوصا وانهم كيشتغلو فقطاع غير مهيكل، وهذشي علاش قترحات 34 إجراء استعجالي من أجل إنقاذ أزيد من 100 ألف منصب شغل تضررو بزاف فهذ القطاع ويقدو ماليهم يفقدو خداميهم، ودعم 1100 انخفض رقم معاملاتها ل79 فالمية.

ومن ضمن هذ الإجراءات اللي قتارحاتها الفدرالية، إنشاء صندوق للطوارئ خاص بالصناعات الإبداعية، ووحث الجهات والجماعات المحلية باش ترصد ميزانية مخصصة للأنشطة الثقافية، ومواكبة فاعلي القطاع باش يديرو منصات رقمية ينشرو فيها إبداعاتهم.

وطالبات الفدرالية كذلك بالتسريع فإصلاح القطاع، اللي قالت بللي يقدر تتسبب الأزمة ديالو فخسارة 2 مليار درهم، من خلال تفعيل جوح محاور: محور يستهدف الشباب وكيسهل ولوجهم للحياة الثقافية ويشجعهم على الإبداع، ومحور لخلق إشعاع اقتصادي إبداعي كيحتاج لبناء نفس ورؤية وطموح.