كود كازا//
علنات وزارة الصحة أن لقاح “سينوفارم” الشينوي، خدا الترخيص لاستعمالو فمجموعة من البلدان للناس اللي فايتين 60 عام، وهذشي كيتعلق حتى بالمغرب، وبأنه مزيان وماكيشكل على هذ الفىة حتى ضرر.
ومن أصل 36 ألف و9 واحد عندو كثر من 60 عام خدا هذ اللقاح فالمغرب، غير 8 دالحالات اللي تسجلات عندها أعراض جانبية خفيفة.
والناس الكبار فالمغرب كيمثلو 20 فالمية، و16,7 فالمية دحالات كورونا و75 فالمية دالوفيات، وهذشي علاش الوزارة كتشوف أنهم من الواجب ياخدو التلقيح
وحسب مخرجات اجتماع اللجنة العلمية الوطنية ADHOC، فالمناعة اللي كيدير الفاكسان ديال “سينوفارم ووهان”، حسب التجارب السريرية اللي دارت فالمرحلة 1 و2، مزيانة لهذ الفئة، وهذشي كيتعلق حتى لفاكسان “سينوفارم بيكين”، بنسبة تتحدد بين 97 حتى ل100 فالمية.
بالنسبة لفاكسان “كورونا فاك” غير المفعل، واللي تصايب وفقا بنفس العملية اللي تصايب بيها “سينوفارم”، اللي تم تطويرو عند الاشخاص اللي عندهم أكثر من 60 عام، حتى هو ثبت فعاليتو بنسبة 99 فالمية.
وبالنسبة للمرحة الثالثة ديال فاكسان “سينوفارم بيكين”، النتائج عطات نسبة فعالية وأمان ديال 86 فالمية، وبالنسبة للمرحلة الثالثة ديال “سينوفارم ووهان” اللي شارك فيها المغرب، واللي شملات الأشخاص اللي عندهم اكثر من 60 عام، تبين أن هذ الفاكسان حتى هو مزيان وفعال.
والمعطيات اللي تم استخلاصها من المرحلة الأولى ديال حملة التلقيح ماعطات حتى إشارة لتفاقم الأعراض الجانبية غير المرغوب فيها بسباب أخذ اللقاح بالنسبة للي عنظهم اكثر من 60 بالمقارنة مع لخرين.
وكان سبق لوزارة الصحة علنات قبل أن لقاح “أسترازينيكا أكسفورد” ماعندو حتى أضرار على المسنين، على عكس ما راج مؤخرا فأوساط علمية فرنسية وألمانية اللي اعتبرات انه غير فعال على هذ الفئة، وأن المعطيات مازال ماواضحاش بشأنو، الشيء اللي خلا دول كثيرة توقف تلقيح الناس الكبار بيه.
وكانت أكدات وزارة الصحة المغربية على فعالية هذ اللقاح البريطاني، وأن المغرب عندو سلطة علمية وقادر يحدد واش اللقاح مزيان ولا لا، وشجعات باش ياخدوه ومايخافوش.
