كود سبور//

قدرت الجامعة الملكية المغربية لكرة القدم تحل مشكل تيكي ماتش المغرب وإسبانيا فثمن نهائي كأس العالم قطر 2022، وسالات معاناة عدد كبير من الجمهور المغربي فقطر اللي كان كيعاني باش يدخل لتيران المدينة التعليمية غدا الثلاثاء لمتابعة المباراة.

ومن بعدما وفرت الجامعة الملكية المغربية لكرة القدم 5000 تذكرة للجمهور المغربي البارح من عند الاتحاد الدولي لكرة القدم الفيفا، خصصت اليوم الاثنين نقطة لتوزيع التيكي فالعاصمة القطرية الدوحة، على المشجعين اللي خداو البارح للموقع الإلكتروني المخصص لبيع التذاكر وخلص التذكرة وخداو لافاكتير.

وكان فوزي لقجع رئيس الجامعة الملكية المغربية لكرة تدخل البارح باش يسالي المسلسل المتعب ديال بزاف من المشجعين المغاربة فقطر، اللي لقاو الموقع الإلكتروني الخاص ببيع التذاكر خاوي وماقدروش يوفورو تذكرة الماتش حيث الأسعار فالمارشي نوار غالية بزاف، وجاب 5000 تذكرة.