كود سبور//

صبح الدولي المغربي منير الحدادي يشكل عبئا على فريق إشبيلية الإسباني، حيث أن الأخير بدا كيبحث على طريقة للتسريح ديالو قبل انطلاق الموسم الكروي المقبل، وتقريبا مستوى الحدادي مع الفريق الإسباني، هو نفس المستوى لي ظهر به من أول مباراة شاكر فيها مع المنتخب المغربي.

وكشفت جريدة “موندو ديبورتيفو” الاسبانية على أن إدارة نادي اشبيلية الفريق ديال إقليم الأندلس، وضعت عددا من اللاعبين لي ما بقاش مرغوب فيهم من طرف الطاقم التقني ديال الفريق، ومن ضمن الأسماء لي من المنتظر تغادر النادي، كاين الدولي المغربي منير الحدادي، لي صبح بمثابة عبئ ثقيل على المسؤولين الاشبيليين.

منير الحداد تراجع مستواه بشكل كبير فالسنوات الماضية، وحتى العام الماضي ما شاركش بشكل كثير فالمباريات ديال إشبيلية، فكان فأغلب الماتشات حبيس مقاعد البدلاء، وحسب نفس المصدر فالفريق الإسباني كيشوف على أن الحدادي ما بقى عندو حتى مكان فالصفوف ديالو وضروري يغادر، من أجل فسح المجال للتعاقد مع مهاجم جديد قادر على تقديم ما عجز عنه اللاعب المغربي.

للإشارة فاللاعب منير الحدادي ما خلقش الجدل فقط فالفريق ديالو إشبيلية الإسباني لي منحو فرصة للرجوع للواجهة من بعدما قام فريق برشلونة بالتخلي عليه، فمنير الحدادي أيضا مكانش مقنع منذ الالتحاق ديالو بالمنتخب الوطني المغربي قبل عامين، فكان دائما الناخب الوطني وحيد خاليلوزيش كيلقى معارضة قوية من الجمهور المغربي بسبب المناداة ديالو على الحدادي وكان كيفضلو على حساب أسماء متألقة، وهاذي من بين الأسباب أيضا لي خلات الشارع الرياضي المغربي يغضب على الناخب الوطني فأكثر من مناسبة، مع العلم أن المغرب منح لمنير الحدادي فرصة ثانية سنة 2020، واحتاضنو من بعدما كان اختار يلعب فالأول للمنتخب الإسباني، لكن الوطن غفور رحيم، والجامعة الملكية المغربية لكرة القدم دارت مجهود كبير على الصعيد الدولي باش تغير الجنسية الرياضية ديال اللاعب من الاسبانية إلى المغربية، لكن الحدادي لم يستغل الفرصة وظل مستواه فتراجع كبير.