كود كازا هناء ابو علي ///

قرار منع مصطفى بكوري رئيس مجلس ادارة الوكالة المغربية للطاقات المتجددة “مازن” من السفر الى دبي الاماراتية خدا ابعاد كثيرة. فاللول اللي كان معروف ان القرار تاخدو القضاء الخميس اللي فات. قرار منع بكوري من مغادرة التراب الوطني. 

الخميس 22 اكتوبر 2020 كانت جلسة عمل ترؤسها الملك محمد السادس حول استراتيجية الطاقات بالمغرب. بيان الديوان الملكي قال بالحرف ان رئيس الدولة “سجل خلال جلسة العمل هاته بعض التأخير الذي يعرفه هذا المشروع الواسع، ولفت الملك الانتباه إلى ضرورة العمل على استكمال هذا الورش في الآجال المحددة، وفق أفضل الظروف، وذلك من خلال التحلي بالصرامة المطلوبة”.

هاد قضية “سجل” الملك فبيان للديوان الملكي كتعني غضبة. اي ان رئيس الدولة ما عاجبوش خدمة رئيس مجلس إدارة الوكالة المغربية للطاقات المتجددة (مازن) مصطفى البكوري. مشروع فيه تأخير وناقصاه الصرامة. 

اجتماع حضرو رئيس الحكومة ووزير الداخلية وجوج مستشارين للملك: الهمة والزناكي ووزير المالية ووزير الطاقة والمعادن والمديرة العامة للمكتب الوطني للهيدروكاربورات والمعادن أم، والمدير العام للمكتب الوطني للكهرباء والماء الصالح للشرب. 

من بعد هاد الغضبة الباكوري غبر على اجتماعات “مازن” لمدة. من بعد رجع يخدم. كلشي كان عادي الى حد ما. بعدها تصاب بكورونا واللي خلات فيه اثار لحد الان. خرج منها ولكن الغضبة بقات تابعاه. 

اللي كيبان من خلال القرائن اللي كاينة هو ان الصرامة اللي كان طلبها الملك لهاد المشروع ما كانتش. هدا اللي كيفسر منعو من السفر
لكن “يا بلادي” خرجات معطى اخر وهو ان بكوري يقدر تكون عندو شبهة التخابر او التعامل مع المانيا. هاد الشي خطير. 

دابا مع ولينا فدجيمس بوند مخلط مع التقصير والتراخي خاص النيابة العامة تخرج ببيان توضح اش واقع. هادا ماشي شخصية عادية. من غير هاد المنصب راه كان امين عام الاصالة والمعاصرة “البام” وهو رئيس جهة الدار البيضاء الكبرى. يعني خبار بحال هادا راه ماشي مدمر غير لعائلتو بل لكاع المهام اللي كيديرها. دابا اش باقي يدير فجهة كازا وواش غادي يجبدو ليه لقديم والجديد ووواش غادي يتقدم للمحاكمة بعد منعو من مغادرة التراب الوطني؟ اسئلة كثيرة وحدها النيابة العامة تقدر تجاوبنا بعد ما خدا القرار ابعاد اخرى