الوالي الزاز -كود- العيون///
الأوضاع الإنسانية فمخيمات تندوف اللي تديرها جبهة البوليساريو غادية لأسوء فظل المعاناة الإنسانية الكبيرة والنقص الحاصل فالمواد الغذائية.
وفهاد السياق صدرات مجموعة من المنظمات غير الحكومية اللي موالية لجبهة البوليساريو بيان كتحذر فيه من هاد المعاناة الإنسانية بسباب خفض برنامج الأغذية العالمي للحصص الغذائية الموجهة لساكنة مخيمات تندوف بنسبة 30 فالمية منذ بداية نونبر الماضي.
وقالت هاد المنظمات اللي أغلبها عاملة فإسبانيا فبيان ليها توزع على وسائل إعلام دولية، أن هاد التخفيض فالحصص الغذائية غادي يأثر على عشرات آلاف الأسر اللي كتعتامد على برنامج الأغذية العالمي فتغذيتها.
وأشارت هاد المنظمات أن جائحة كورونا والحرب في أوكرانيا تسببات في تضخم منتجات التغذية في السوق الدولية، مما أدى إلى عجز الجهات الفاعلة الإنسانية عن الاستجابة بشكل مناسب للاحتياجات الأساسية للساكنة، ولاسيما للناس اللي تعاني حالات فقر الدم وخاصة النساء الحوامل والمرضعات.
وطالبات هاد المنظمات المنتظم الدولي ووكالات التعاون باش تعبئ الموارد اللازمة باش تواجه الأزمة الغذائية فمخيمات تندوف.
ويشار أن برنامج الأغذية العالمي كيوقف براسو على توزيع الحصص الغذائية على ساكنة المخيمات بعيد على البوليساريو بسباب الخوف من اختلاس القيادة المساعدات الموجهة للساكنة وعدم وصولها لمستحقيها.