ميريكان غادي تعطي مكافأة ديال 10 مليار لأي واحد غادي يعطيها معلومات على المشة الكحلة
عفراء علوي محمدي//
اعتبر المؤرخ والحقوقي المغربي، المعطي منجب، ان الحكم الصادر فحق الصحافي، سليمان الريسوني، هو حكم ظالم جدا، وقال انه مصدوم، وبيه “مابقيتش كنعرف المغرب..”، حسب تعبيرو.
وزاد منجب، فتصريحو ل”كود”، أن هذ الحكم هو انتقامي بالأساس، من افتتاحيات سليمان الريسوني القوية، من بعد ما خدا من خلالها المشعل من الصحافي المعتقل توفيق بوعشرين، “رغم المخاطر والتهديدات والاقتراحات اللي كيجيوه للعمل فجرائد ديال الدولة”، حسب تعبيرو.
وقال انه من الممكن يقود هذ الحكم لوفاة سليمان، المضرب عن الطعام ل93 يوم، كما انه غير قانوني بالنسبة ليه، حيت ماحضرش جلسات كثيرة، واخا كان متشبت بالحضور، وهذشي لاسباب إعلامية محضة، اي باش مايباش فديك الحاصة الصحية الحرجة، وهذا تدبير سياسي، على حساب هضرة منجب.
وكيشوف ان هذشي كيقضي على ما تبقى من سمعة المغرب في الخارج، والقضاء على ما تبقى من الريسوني.
وتابع: “النظام ولا يقضي على كل مخالف له، وولا الانتقام من المواطنين فقط لأنهم كيعبرو بحرية”.
وتمت إدانة الريسوني ابتدائيا بتهم هتك العرض بالعنف والاحتجاز، وتكم عليه ب5 سنين ديال الحبس، وتعويض المطالب بالحق المدني ب10 مليون سنتيم.