كود سعيد الشاوي – ت ايس برس ///

ملايرية الجايحة. هادو ايلى ما ساهموش بالملايير فالصندوق خاص الدولة توقف عليهم المارشيات. كيفاش “افان سين” و”كابيتال ايفنت” و”بليك ايفانت” كياخدو مارشيات ومنهم اللي خدا حتى ف”كورونا” وما شفناهمش والو فلائحة اللي تضامن مع بلادو ضد هاد الجايحة.

“لوديسك” جبدات فضيحة كبيرة على گاطو كورونا فيروس”. الجريدة الالكترونية الصادرة بالفرنسية كشفات على صفقة بناء مستشفى فالمعرض الدولي لصحاب كورونا. المارشي فيه 45 مليون درهم خداتو “بوبليك ايفانت”. فيه 700 سرير فالبلاصة اللي كيتنظم فيها المعرض حدا جامع الحسن الثاني فكازا. المقال هدر على سكاندال نايض بين صحاب الشركات.

مول الشركة قال ل”كود” باللي الرقم ماشي صحيح وباللي هاداك المارشي فيه اكثر من 15 شركة

وزير المالية والاقتصاد كان دار دورية باش الصفقات العمومية تكون مرنة فزمن “كورونا فيروس” ولكن باش الوالي يعطي هاد المارشي بهاد الثمن نايض عليه الصداع.

كاينة مشكلة اخرى. هاد “كابيطال ايفانت” و”بوبليك ايفانت” و”افان سين” وزيد عليهم شركات اخرى… كلاو مع الدولة ودارو فليسات بحالهم بحال شركات كيخدمو فالاشهار وشي شركات الانتاج السمعي البصري… ما شفناهمش باش لمغاربة كانو كيساهمو فصندوق كورونا.

كيفاش هادو عايشين غير من فلوس الدولة ومارشياتها. علاش ما يديروش هاد المشاريع فابور يتخلصو فقط فاللي غاديين يخسروه من مواد اولية ومن يد عاملة.

خاص شي جبهة تشكل تنوض لهاد العينة. هاد الملايرية اللي مرفحين بزاف وما عطاو والو للدولة. كاينين شي وحيدين عندهم لكلينيكات اللي مصو دم لمغاربة وگزروهم وكاينين هاد الناس وكاينين مالين الوكالات ديال الاشهار والانتاج وكاينين صحاب شي مطاعم وبلايص النشاط….. جا وقت الجد غبرو

لفلوس اصلا ما كايناش مع الازمة خاصهم يساهمو بزاف بزاف مع الدولة.