نجوى المالحي-كود//
قدرات مغربية تطلع مع الممثل العالمي ميشيل موروني في لايف على انستكَرام، وكانت غادي تسخف بالفرحة، خصوصا أن الممثل طلعها معاه بشكل مفاجئ.
اللايف كان مع الممثل وعارض الأزياء الإيطالي ميشيل موروني، ولي الشهرة ديالو دابا عالمية، بعدما لعب دور البطل فالفيلم البولوني الايروتيكي “365dni” اللي كيدوز في نيتفليكس، وااللي كيتعتابر الأكثر مشاهدة في المنصة في بزاف ديال الدول.
الفيلم من غير انه تشاف بزاف، منوض جدل كبير، حيت النقاد قالو عليه انه فيه تمجيد واضح لثقافة الاغتصاب، وتشييء المرأة، والذكورة، وافكار قروسطية داز عليها التران ومابقاتش صالحة في عصرنا.
الفيلم كيعاود قصة رئيس مافيا “دوميناتور”، غادي يختاطف ويحتاجز مرأة، وغادي يعطيها عام باش توقع في الحب ديالو.
وبغض النظر على محتوى الفيلم، والمشاكل اللي نايضة عليه، المغربية عبرات على الحب ديالها للممثل بالانجليزية، وحتى اللايف حقق مشاهدات كبيرة في المغرب، وتبارطاجا في بزاف ديال الصفحات ديال المشاهير في أنستكَرام.
