عفراء علوي محمدي- كود//
عبرات مواطنة مغربية عايشة فتولوز الفرنسية على الغضب ديالها من شركة “لارام”، من بعد ما قطعات 5 تذاكر ف3 يونيو بثمن غالي، قبل ما تآنيلات رحلاتها بلا حتى تفسير، وبلا مايرجعو ليها فلوسها.
وقالت المواطنة، فتدوينة فحسابها على “فيسبوك”، قبل ما تحذفها من بعد: خلصت 5 بيي ف3 يونيو 2021 بثمن غالي، وماستفدتش من الخصم اللي دار على الرحلات للمغرب، ومن بعد الشركة موديفيات تواريخ واوقات الرحلات اللي عندي على مزاجها، واليوم كنتفاجأ أن الرحلات تلغاو بلا تفسير، اتصلت بجميع الارقام وسيفت فالإيمايل شي 20 رسالة ووالو ماجاوبونيش…”
وزادت انها ماعرفاتش واش غيرجعو ليها فلوسها، حيت الشركة اللي لغات الرحلات وماشي هي، “وعاد عندي ريزيرفاسيون فاوطيل، وتفاهمت مع وكالة سياحية ووجدت برنامج لزيارات استكشافية…”، حسب تعبيرها.
وكشفات انه مابقاو حتى شي رحلات جوية متاحة دابا، “ودابا ولادي لقاو راسهم بلا عطلة، واخا وجدنا ليها من ماي… انا مابغيتش لفلوس، أنا كنطلب غير الاحترام.. هذشي ماشي معقول”، كتقول المواطنة.
وفردو على هذشي، قال مسؤول فشركة “لارام”، فتصريح مقتضب ل”كود”، بللي “خاصنا نتأكدو بعدا من شنو كتقول هذ السيدة قبل ما نعقبو على شكايتها، حيت ماشي أي حاجة كتنشر صحيحة”.
وزاد: “باش نتاكدو بعدا خاصها تعطينا معطيات على التذاكر ديالها، وهذشي ماكاينش فتدوينتها”.
وأكد أن “لارام” كتواصل ديما مع زبناءها، بالتيليفون بالإيمايل، “والى كان العكس تعطينا الدليل”، حسب تعبيرو.
لكن فالمقابل، عبر مسؤول الشركة على رغبتو فمساعدة المعنية: “خاص غير نعرفو معطيات على التذاكر ونديرو من جهتنا اللازم…”.
وحاولات “كود” تتواصل عبر فيسبوك معها لكن ماتلقاتش جواب.