سهام البارودي – كود//
مؤخرا تاصلات بيا واحد الصديقة قالت ليا راني عارفاك مهتمة بالمشاريع الخاصة و بغيتي ديري مشروع ديالك و أنا لقيت واحد الفكرة واعرة و بغيت نعرضها عليك ! قلت ليها مرحبا شنو هي الفكرة ؟ هي تقوليا راه ماغاديش نقدر نشرح ليك الفكرة ديالنا مزيان غادي نعيط للواحد السيدة هي عندها خبرة عليا و عارفة احسن مني تشرح ليك، فوقاش نقدرو نعيطو ليك ؟ آو هادي غاتشرح ليا النووي ؟ قولي ليا شنو؟! واش غانبيعو التقاشر ؟ لا مانقدرش نقوليك ! غانبيعو الگراصن ؟ النفحة ؟ الحشيش ؟ غا قولي نفهم بعدا ! لا خاص حتى تجي بعرورة تشرح ليك ! واخا نساينو هاد بعرورة!
تافقنا على الموعد و فعلا مع وصل الوقت تاصلو بيا كانلقا صاحبتي و معاها واحد اللاصيانة ! باطرونة شميت فيها ريحة النصب و الاحتيال من التيساع ! مبتاسمة من الودن تال الودن ! بدات عليا بأنا كنت فحالكم ! تانا خدامة صالاريي و ماكانش كايقدني الصالير و ماكنتش كانلقى الوقت باش نجلس مع وليداتي فالدار و كنت كانكمل الشهر من عند الواليدة و كنت كانعيش فالستريس ديال الخدمة و كدا كداشي و رسمات ليا واحد الصورة قاتمة على الصالاريا و الوظيفة يصحابني انا فحالها الفقيرة تمها ! و الانسان خاصو يكون حر و يدير مشروع ديالو … باش ينجح و يقدر يولي ميليونير و ملياردير و يسافر و يعيش و يخلص لولادو احسن المدارس مافراسهاش انا راه اصلا لا حماد لا محماد و يدير دار و طوموبيل داكشي درتو قبل ماتفيقي من النعاس و و و …. ساعة ! ساعة ديال الهضرة و الضرب فالوظيفة و تقديم المشاريع الشخصية كحل سحري غايبدل ليا حياتي للاحسن ايوا ؟ و شنو هوا المشروع آ لالة لي غانديرو باش نربح هادشي كامل ؟
مابغاتش تقوليا ! قالت ليا كانقتارح عليك نعاودو نتعايطو باش نشرح ليك المشروع ديالنا !
بغات زعما تخليني نفكر فدوك الاحلام لي باعت ليا و نحلم بداك المستقبل لي واعداتني بيه باش فاش تجي تقوليا على المشروع ( النصباوي) الحامض نتقبلو بدون تفكير ! تلقاني واجدة باش تخشيه فيا تال زدگاداگ !
و فعلا داكشي لي كان فاش عاودات تاصلات بيا فهمت بلي المشروع هوا البيع الهرمي ! ندخل معاهم للشركة ديالهم و نشري من عندهم مليون تال جوج د المليون ديال السلعة لي هي ماسلعة ما تاقلوة غا الجوالق و التخربيق و من بعد خاصني تانا ندخل جوج ديال الناس تاهوما يشريو داك التخربيق و كل واحد من هادوك لي دخلت يدخل تاهوا جوج … و نبقاو غادين هاكا شي خاشيه فشي تال عند مول شّي.
لي لاحظت هوا أنه شركات البيع الهرمي انتشرت بزاف و خصوصا فالدول الفقيرة و لي مافيهاش قوانين واضحة كاتحمي المواطنين ، خصوصا مورا الازمة د كورونا لي بزاف د الناس فيها فقدو الخدامي ديالهم و هاد الغلاء لي كانشوفو … بزاف د المغاربة وصلو لمرحلة اليأس ! بنادم مقاتل مع الوقت الصالير ماكايكفيهش هادشي الى لقاه و كايدخل لانستاغرام كايلقا طاها ايسو ( الله يسهل عليه) كايشرب هاواي فهاواي ! هادي مغنية راكبة فاليخت ديالها هادي مؤثرة صايگة الرونج لي شرات بعرق الترمة … كايبغي يتسطى كايقول مالي انا بوحدي لي مقاتل باش نعمر البوطة و نخلص الضو ؟ علاش تانا مانوليش لاباس عليا ؟ و هنا فين كايطيحو عليه هاد الشركات ديال النصابة باش يديو ليه فلوسو !
لي لاحظت ايضا انه مابقاوش كايقتاصرو على بنادم لي ماقاريش او لي ماعندوش ! لا دابا ولاو كايضربو حتى بنادم لي قاري و كايسيبليو لي عندو و قادر يحط ليهم جوج بريكات دقة وحدة العامل المشترك هوا اليأس ! الى شمو فيك ريحة اليأس كاتولي فريسة سهلة ليهم !
اليأس اصلا داير فحال ريحة الدم كايجر ليك غا الثعالب ينهشرو فيك.
للاسف هاد الشركات كايورطو الناس ! كاتولي داخل نتا و حاط جوج بريكات و كايقولو ليك خاصك جوج د الناس شوف مع ماماك دخل معاك شوف مع خوك شوف مع زملاءك فالخدمة كاتولي غارق نتا و مغرق معاك شعب ديال البشر ! كاتبغي تخرج كاتلقا راسك غارق معاهم و حاط فلوسك كاتبغي تكمل كاتلقا مابقا ليك ماتنصب حيت الناس المكلخين و اليائسين سالاو و حيت حنا اصلا ستة د المليار فوق الكرة الارضية واش غاتصيدونا كاملين ؟ و من بعد؟ شكون غاتصيدو ؟
