كود كازا//
معارضي الأمين العام للحزب المغربي الحر، إسحاق شارية، وأعضاء من الحركة التصحيحية، غاديين فالتحضيرات ديال مؤتمرهم الاستثنائي، من بعدما قرور أغلبية أعضاء المكتب السياسي العزل ديالو.
المعارضين داخل الحزب أكدو أنهم عندهم الثلثين من الأعضاء دالمجلس الوطني فصفهم، من وجدة وفاس ومراكش وكازا، وقريب يعلنو على المؤتمر الاستثنائي.
لكن لحد الساعة، مازال حتى شي عضو ما حط ترشيحو لمنصب الأمين عام، من غير أنه كاين حديث على أن نائب رئيس لجنة الحركة التصحيحية، يوسف خوادر، غادي يترشح.
فجوابو على هذشي فتصريح ل”كود”، قال خوادر أنه ماحسمش، ومازال ماتوضحات الأمور، “ولكن راه كاينين مناضلين معانا اكفاء ويستحقو هذ المنصب هم كذلك”، على حد تعبيرو.
و”كان من المقرر يدار المؤتمر الاستثنائي هذ الاحد القادم 25 أبريل فاحد فنادق فاس، لكن فالغالب هذ التاريخ غيتأجل لوقت لاحق على ما نقادو امورنا، ومن بعد غنديرو بيان للصحافة على التاريخ المتفق عليه”، حسب خوادر.
وزاد أنهم خداو الوصل الأولي باش يديرو المؤتمر الاستثنائي، ومازال كيتسناو الترخيص النهائي الرسمي، وجميع أعضاء المجلس الوطني باغيين المؤتمر يدار بشكل استعجالي.
وفالوقت اللي 10 من أصل 19 داعضاء المكتب السياسي عزلو شارية، الأخير فاجتماع دورة للمجلس الوطني طرد منهم 4، من بينهم خوادر، لكن معارضي شارية كيعتبرو هذشي غير قانوني، حيت نصاب الدورة ماكانش مكمول، الشي اللي نفاه شارية فخرجاتو واكد أن الأغلبية مازالين فصفو.