كود القاهرة ///
المصريون شعب كلمة. مع الكل وما كيخسر حتى شي حد. البارح سالى الماتش بين المغرب وناميبيا فملعب السلام بالقاهرة عن اول مباراة فالمجموعة 4 فلكأس افريقيا للامم المقامة بمصر٬ بداو يباركو. فالطاكسي يباركو فالمطعم يباركو فلوطيل يباركو فالزنقة يباركو. كلهم غير كيعرفوك مغربي “مبروك للفوز” طبعا مع كلمات “يا باشا” يا …..
“مبروك عليكم الفوز” هذه عبارة تتردد. ما كيدخلوش معاه كيف جا هاد الرباح. كيفاش خرج من المعاناة. بعد مباراة صعيبة مخربقة مع منتخب جا كيف قال مدربو ريكاردو يدافع حقاش ما عندوش اللعابة باش يقدر يدير شي خطة اخرى من غير الدفاع.
لكن المصريون باش كيباركو ليك كيزيدو باش تدخل معاهم كيف داز الماتش وكيفاش تماركا الهدف “المهم الفوز”. فهادي واقعيين بحال مدرب المنتخب المغربي ايرفي رونار البارح وعكس عدد من مناضلي الفايس اللي كانو كيتسناو البارح شي نتيجة مقودة للاسود. ناس مصر كيشرحو هاد الشي “هادا اول ماتش فالبطولة. الماتش الاول كان صعب. بحال اللي وقع لينا فالافتتاح. المهم حنا ربحنا بهدف. انتوما ربحتو بهدف. سجلو الخصم او ما سجلوش المهم الانتصار”.
يتوقع هؤلاء المصريين بحالهم بحال ما توقع البارح مدرب ناميبيا ريكاردو “باش يمشي المغرب بعيد. يوصل للنهاية ويفوز بالكاس” غير هما المصريين كيختالفو معاه فنقطة وحدة. كيقولو بعد ما شافو الماتش البارح “نتمنى نلعب النهاية مع المنتخب المغربي. وطبعا نتمنى ان يكون الفوز حليفا لنا”.