كود الرباط//

كشف مصدر مسؤول في شركة الخطوط الملكية المغربية، بخصوص برمجة رحلات صيف 2021، عن وجود طلب كبير في حجز التذاكير، طلب كيفوق العرض، بحيث فقط فالساعات الأولى تم حجز ما يناهز 120 ألف تذكرة.

هاد الحجوزات اللي وصلت لـ120 ألف تذكرة فالساعات الأولى من قرار تخفيض أثمنة التذاكر، حسب نفس المصدر، يمكن نضربوها خمس مرات باش نوصلو لعدد الطلبات، يعني كثر من 2 مليون مغربي باغي يقطع.

الخطير حسب نفس المصدر أن كولشي باغي يقطع فواحد فترة معينة،  فترة ما قبل العيد واللي هي فترة الذروة ، وهادشي صعيب يتحقق لأنه “الامكانيات اللوجستكية والبشرية ديال لارام ميمكنش تلبي هاد الطلب الكبير”.

ويقول المصدر فـ”لارام” لـ”كود” :”الساعات والايام المقبلة غانزيدو فيه المجهودات ونكثرو فالطاقات البشرية والوسائل اللوجستيكية”.

دبا 30 في المائة من الطاقة الاستيعابية عمرات، بقات 70 في المائة من الطاقة الاستيعابية ما زالت متاحة للتسويق، ولكن “باش تكون الامور ميسرة خاص المهاجرين يختارو توقيت اخر ويبدلو التوقيت اللي طلبو”.

وتضاعف الطلب على التذاكر لأكثر من 100 مرة مقارنة مع الأيام اللي قبل قرار التخفيض.

وعن الانتقادات الموجهة لشركة لارام، قال ذات المسؤول :”بالعكس كاين تواصل وحنا لا ننفي انه مكانش شويا ديال الارتباك فاللول لأن القرار جا ف فترة معينة وبسرعة وخلانا نبدلو أقصى مجهوداتنا”، مضيفا :”كاين اللي كيستغل بعض المشاكل اللي كتخلينا حنا ضحايا ديال النجاح اللي حققنا”.

وكان بلاغ صادر عن لارام، أكد أن مجموع التذاكر الصادرة إلى حدود 13 يونيو، ستستفيد من تعويض قيمة التذكرة على شكل قسيمة يمكن استغلالها في وقت لاحق في إطار رحلات الشركة، صالحة لمدة 12 شهرا وقابلة للاسترداد نقدا عند انتهاء صلاحيتها.

وتابع نفس البلاغ :”كما سيكون بإمكان نفس التذاكر، الاستفادة من تغيير في تاريخ الرحلة من دون جزاءات، ويمكن، بشكل استثنائي، تمديد تاريخ صلاحيتها إلى غاية 31 مارس 2022 عوض تاريخ 31 أكتوبر 2021 المقرر سلفا”.