مصطفى الشاذلي – كود سبور //

روينة فعملية بيع تيكيات نهائي عصبة أبطال إفريقيا. فمع طرحها للبيع في موقع الجامعة الملكية المغربية لكرة القدم، بدات شكاوى من الفوضى الكبيرة التي تشهدها هذه العملية، واللي خلقت حالة من الارتباك الكبير وسط أنصار نادي الوداد البيضاوي والراغبين في متابعة هذه القمة الكروية من مدرجات دونور، الإثنين المقبل.

وواجه الراغبون في شراء تذاكر المباراة صعوبات كبيرة في رحلة بحثهم، إذ تحولت إلى جحيم، زرعت حالة من الشك حول طريقة تدبير هذه العملية.

هاد الصعوبات كان أبرزها المشاكل التقنية التي اعترضتهم عد ولوج الموقع. فعدد كبير ما قدرش يدخل ويقطع التيكي ديالو، فوقت اللي السيت طاح أكثر من مرة، ليجدوا أنفسهم في قاعة انتظار افتراضية يجهلون فترة انتهاء مدتها الزمنية. هذا مع العلم أنه كاين اللي لقى راسو بعد التسجيل أنه يوجد في لائحة انتظار طويلة يقدر نوبتو فيها ماغاديش توصل حتى للعام الجاي حيت ترتيبه جا ورا حاجز الـ 90 ألف.

واللي زاد هاد الجحيم هو المارشي نوار. بدا التبزنيز من دابا وخا طرح التذاكر مزال مستمر، وسط تساؤلات عديدة على الكيفية اللي حصلوا بيها على هاد العدد من التيكيات، بينما كاين اللي باغي غير وحدة ومالقاش كيفاش يوصل ليها وخا تبع جميع المراحل اللي تطلبات منو عندا ولج موقع الجامعة.

يذكر أن المواجهة مرتقبة، الإثنين المقبل، بالمركب الرياضي محمد الخامس بالدار البيضاء، حيث تجري استعدادات مكثفة لإنجاح هذه التظاهرة الرياضية.