عفراء علوي محمدي- كود//

طلب أمين عام مجلس الطوائف اليهودية بالمغرب سيرج بيرديكَو، من والي جهة طنجة تطوان، محمد مهيدية، باش يبلغ الملك محمد السادس الشكر والعرفان ديالو، من أجل قرارو بإعادة تسمية بعض الزناقي فالمدينة بالإسم ديالها العبري اللي كان.

طلب بيرديكَو لمهيدية هذا كان فإطار زيارتهم مؤخرا لمعبد “أساياكَ” اليهودي فطنجة، اللي كيتم ترميمو وتحويلو لمتحف خاص بالثقافة اليهودية.

ومشروع إعادة تسمية الزناقي، وكذلك إعادة ترميم المعهد، كيدخلو فإطار برنامج إعادة تأهيل وتثمين المدينة العتيقة فطنجة، بشراكة مع الطائفة اليهودية فالمدينة.

فهذ الصدد، وضع بيرديكَو، مركز التوليد التابعة للطائفة اليهودية فطنجة، رهن إشارة الولاية، اللي غيتم تأهيلها من أجل استقبال النساء اللي غادي يولدو، تطوعا، وهذ المشروع غيدار بتعاون مع الدكتور العبادي، وغيشمل مدرسة ديال المولدات والفراملية المتخصصين.

ومن بين المشاريع اللي كتدخل فالبرنامج، واللي كتهم حفظ التراث اليهودي، كاين افتتاح ريسطو يهودي غيدار فالدائرة اليهودية فطنجة.