الرئيسية > آش واقع > مستشار حكومة إسرائيل: البوليزاريو وعسكر الدزاير غير شمايت.. وإسرائيل ديما واقفة مع المغرب فقضية الصحراء
18/02/2020 15:30 آش واقع

مستشار حكومة إسرائيل: البوليزاريو وعسكر الدزاير غير شمايت.. وإسرائيل ديما واقفة مع المغرب فقضية الصحراء

مستشار حكومة إسرائيل: البوليزاريو وعسكر الدزاير غير شمايت.. وإسرائيل ديما واقفة مع المغرب فقضية الصحراء

عفراء علوي محمدي- كود//

إيدي كوهين، مستشار الحكومة الإسرائيلية والإعلامي الإسرائيلي، خرج بتويت جديد ف”تويتر” باش يتكلم تاني على علاقة المغرب بإسرائيل ومساندة هذ الأخيرة ليه ضدا فالبوليزاريو، وهذ المرة التغريدة كانت بالدارجة المغربية.

وقال كوهين، فالتويت اللي نشرو لبارح بالليل: “دولة إسرائيل وميريكان ديما واقفين مع المغرب فقضية صحراء، والپوليزيرو شمايت هوما و ݣاع دوك لعساكرية ديال دزاير الفرونكوفونيين لي كايضربو فلوحدة ترابية ديال جيرانهم”.

واستنكر كوهين، بنبرة ساخرة، دعم الجزائر للبوليزاريو، وقال: “ياك ݣاع نقولو عار الجار على جارو.. واللي دار الذنب يستهل العقوبة”.

وبدون شك فكوهين اختار الحديث بالدارجة المغربية فالتويت باش يخاطب المغاربة ويوصل رسالتو لشريحة كبيرة منهم.

وغير هذ الصباح، بارطاجا مستشار الحكومة الإسرائلية تصويرة صديق إسرائيلي ليه اسمه جيكوب بيريز مصور فيها زلافة دالحريرة مع الشباكية فواحد من المطاعم المغربية، الشي اللي كيعني أنه معجب بالثقافة المغربية، وكيطمح للصداقة ديال إسرائيل مع المغرب.

وكان كوهين ثار الجدل مؤخرا، من بعد ما نشر تغريدة ف”تويتر” فالأيام القليلة اللي فاتت، كيقول فيها: “قنصلية الولايات المتحدة الأميركية إلى الصحراء المغربية وسفارة إسرائيل إلى الرباط قريبا جدا”.

كوهين دار هذ التدوينة من بعدما نشر موقع “أكسيوس” الميريكاني خبر يفيد بللي إسرائيل وميريكان كيناقشو اتفاق باش تعترف واشنطن بسيادة المغرب على الصحراء مقابل تطبيع الأخير مع إسرائيل”.

موضوعات أخرى

29/03/2024 09:15

الوداد طواو صفحة الناصيري وطلعو البرناكي كرئيس 20 فتاريخ النادي ودارو مليون للي بغا ينخرط

29/03/2024 09:00

علاش الاتحاد الأوروبي كيلعب لعب خايب مع المغرب وكيشكك فالسلع الفلاحية ديالو؟

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه