كود الرباط//
الهيئة الوطنية للأطباء، أو اللوبي ديال بعض الأطباء المرفحين الملايرين اللي دايرين ما بغاو فقطاع الصحة، حيث هاد الهيئة مكتمثلش اطباء المغرب، وكاين بزاف الاطباء ضدها، هاد الهيئة اليوم خرجات عينها فالحكومة وكترفض قانون مزاولة الطب اللي كيمنح الحق للأطباء الأجانب يزاولو المهنة فالمغرب.
هادو مكيحشموش وكولشي عارفهم اش دارو، بلا ما نهضرو على فضايح المصحات الخاصة (باسثتناء البعض اللي كيحركهم حب هاد البلاد)، طغاو بزاف بالتغراق للمواطنين، وهادشي راه تفرش ف تقرير رسمي دارتو اللجنة اللي ترأسها الحبيب المالكي رئيس مجلس النواب، حول الصحة.
دبا نجيو نشوفو شنو بغاو هادو، قالو راه الصيغة اللي صادقت عليها الحكومة ماشي هي اللي عرضت عليهم، وعلاش شكون هوما، راه امشروع القانون عندو مساطر وممكن ملاحظات الوزراء تكون فيه، راه الحكومة من حقها تبدل فديك الصيغة، ولا بغيتو نتوما تشرعو كيف بغيتو فهاد البلاد، كيما كاديرو ف خدمتكم.
هوما عارفين بلي فتح مزاولة مهنة الطب أمام الكفاءات الأجنبية جاء باش ينجح مشروع تعميم الحماية الاجتماعية الموقع أمام أنظار الملك محمد السادس، هادو مشروع ملكي حيث كولشي فالدولة عارف التحديات الكبيرة امام تنزيل الحماية الاجتماعية، راه ميمكنش طاطا والراشيدية وسيدي ايفني وزاكورة واقاليم الجنوب، والشرق وكاع المناطق المهمشة متوصلهمش الحماية الاجتماعية حيث الأطباء مبغاوش يخدمو تما، لذلك هاد الورش فتح الآفاق وممكن نشوفو مستثمرين اجانب يفتحو مصحات خاصة فهاد المناطق، وديك هاد اللوبيات اللي نهكات جيوب المغاربة يتهدنو شويا.
هيئة الأطباء دارت رسالة موجهة إلى رئيس الحكومة، فيها مبررات غبية باش يعرقلو مسار هاد المشروع اللي جا بإرادة ديال القصر اللي ديما واقف مع البسطاء وحقق انجاز كبير للناس اللي معندهمش التغطية الصحية، دبا هادو ضد ارادة الملك وصافي. مكيحشموش.
مبغاوش الاستثمار الاجنبي، حيث عارفين الى دخلو الاطباء المرفحين من برا، مالين المصحات الخاصة غادي يهبطو كواريهم، واراك المنافسة، وحتى الاطباء المغاربة غادي يلقاو جو مزيان للعمل، حيث ماشي غير وزارة الصحة اللي كتحمل المسؤولية فهروب خريجي كليات الطب فالمغرب للخارج، راه حتى هاد اللوبيات.
هادو عاد بانت ليهم بلي تهديد صحة المواطنين، بسبب فتح مزاولة مهنة الطب أمام الأجانب، والسنوات اللي فاتت شنو كنتو كاديرو، علاش متحاسبوش راسكم على الاخطاء اللي درتو. عندك تاريخ سيء كولشي عارفو بما فيهم الأطباء اللي مبقاوش كايثيقو ف هاد الهيئة.
هادو اللي ساكتين على فضايح المصحات الخاصة، مخصهمش يعطيو دروس دبا للدولة، واش تخلص المصحة وتحط شيك ضمان وتحط فالنوار ماشي “اكبر فساد اللي درم المنظومة”، وزيد وزيد.
المغرب نجح فالجائحة فتدبيرها، نجح فالفاكسان، نجح فقطاعات كثيرة، راسو مرفوع دبا، دار خطوات كبيرة، حرر الكركرات، غادي بخطوات مهمة نحو المزيد من التحرر الاقتصادي، ولكن فحال هاد مسامير الميدة مكيحشموش.
تفاصيل اضافية كتهضر على شنو دار هاد اللوبي باش يعرقل هاد المشروع في مقالات مقبلة.
