وكالات //

مسافرة سميتها “ماريسا فوتيو” (Marisa Fotieo) كانت مسافرة من مطار شيكاكَو بولاية إلينوي الميريكانية وغادة لسويسرا، لكن فالطيارة تزيرات وحسات براسها ماشي هي هاديك واختارت بعدما اكتاشفات أن القضية فيها فيروس كورونا، (اختارت) تكمل الڤوياج من وسط الطواليط وتعزل راسها على المسافرين الآخرين.

ماريسا، اللي خدامة أستاذة فميشيكَان، وقبل ما طلع الطيارة دارت تيست “PCR”، و 5 اختبارات سريعة، وكانت النتائج كلها سلبية، لكن واحد الوقيتة ضرها حلقها وتزير عليها الحال وملي دارت تيست-راپيد لقات راسها پوزيتيف.

السيدة تخلعات وحيت ماكانش بلاصة خاوية سدات على راسها فالطواليط لمدة طويلة، باش ماتعاديش الناس.

ودبا وصلات بيخير ودخلات فحجر صحي وسط أوطيل وحالتها مزيانة.