عفراء علوي محمدي- كود//
كشف بروفيسور جلال نور ليل، المسؤول على مختبر علم الفيروسات الناشئة والأكثر خطورة فمعهد باستور، أن فيروس كورونا المستجد المتسبب فمرض “كوفيد 19” يقدر يمشي كيف يقدر يبقى معانا، ونولفوه، ويتزاد مع فيروسات أخرى متعايشين معاها حاليا.
وكشف نور ليل كذلك، اليوم الأربعاء فندوة عن بعد نظمها المعهد حول “الكشف المخبري عن فيروس كورونا: الوسيلة والغاية”، أن المختبر دار من نهار بدا الوباء لحد الآن 60 ألف تحليلة، وكيدير التحاليل ل2000 حتى ل3000 تحليلة فالنهار.
وصرح أن مختبر باستور فالبداية ماكانش كيتوفر على إمكانيات كبيرة باش يواجه الفيروس، وكانو عندو معدات تكفي لتحاليل محدودة فقط، لكن من بعد تم تزويدو بمعدات جديدة، وولا مخدم 14 فرد باش يقومو بهذ التحاليل عوض 5، وكيخدمو 24/24 وسبع أيام فالأسبوع.
وحسب البروفيسور، التحاليل كتجرى فظروف آمنة، بحيث كيتم استعمال قريعات خاصة باش الفيروس ماينتشرش قبل التحليل، وبالتالي يتم حماية الأشخاص اللي ميقومو بنقلو للمختبر وحتى المختبرين، وكيتم كذلك الاشتغال ب”البيو سيكيريتي 2″، واللي هي درجة الحماية اللي لزمات منظمة الصحة العالمية على المختبرات يتوفرو عليها للقيام بتحاليل كورونا، وتكلم نور ليل على اختبار ما بعد فصل النوات اللي كيتم التأكد من خلالو واش العينة تخدات مزيان.
ومنذ ظهور الوباء فووهان، أكد نور ليل بللي المعهد دار أبحاث أولية باش يشوف مدى قدرتو على إجراء التحاليل عن طريق أجهزة PCR، وتم التأكد من نجاعتها، خصوصا وأن الفيروس ماطرا عليه حتى تغيير، كيف تكلف مختبر باشتور بإعداد دلائل توجيهية تفرقات على بقية المختبرات والمستشفيات الجامعية.