الرئيسية > آش واقع > مسؤولين كل نهار كيديرو ليهم “بي سي ار” فانتظار زيارة محمد السادس. وا سيدنا راه كويزا غادية تبقى على حالها ايلى الاستثمار ميت واللي مسؤول على موتو هو الوالي ومدير الوكالة الحضرية. هادو خاصهم يمشيو فحالهم ماشي يكونو فاستقبالك
30/11/2022 12:00 آش واقع

مسؤولين كل نهار كيديرو ليهم “بي سي ار” فانتظار زيارة محمد السادس. وا سيدنا راه كويزا غادية تبقى على حالها ايلى الاستثمار ميت واللي مسؤول على موتو هو الوالي ومدير الوكالة الحضرية. هادو خاصهم يمشيو فحالهم ماشي يكونو فاستقبالك

مسؤولين كل نهار كيديرو ليهم “بي سي ار” فانتظار زيارة محمد السادس. وا سيدنا راه كويزا غادية تبقى على حالها ايلى الاستثمار ميت واللي مسؤول على موتو هو الوالي ومدير الوكالة الحضرية. هادو خاصهم يمشيو فحالهم ماشي يكونو فاستقبالك

كود كازا ///

مسؤولين ومنتخبين فكازا حاصلين هاد ليام. ما يقدروش يتحركو. السبب زيارة مرتقبة لسيدنا لهاد المدينة. كان من المتوقع يجي لثلاث وتقلبات لاربعا ودابا للخميس. حتى حاجة ما مضمونة دابا. الاستعدادات كملات. كيتسناو غير يجي. المسؤولين اللي غاديين يسلمو عليه او يكونو حاضرين فشي نشاط يشرف عليه محمد السادس٬ راهم يوميا كيديرو البي سي ار.

هاد الزيارة مزيانة لكازا. للمدينة. للمشاريع اللي كاينة فالمدينة. للكازاويين. غير هي صعيبة يكون فاستقبال الملك والي الدار البيضاء حميدوش سعيد وهاداك ديال الوكالة الحضرية بنعلي توفيق. دابا حميدوش ماشي حقاش قلل حياه على الصحافة هادي ايام٬ اللا. حقاش ما كيخرجش من مكتبو يا سيدنا. انت قلتي خاص المسؤولين يخرجو ويتلاقاو مع الناس ومع المسؤولين لخراين باش تحرك القضية. هادا والو. هادا مثال نقيض لوالي بحال مهيدية فطنجة او اليعقوبي فالرباط. هادا ما صلحش لكازا. هادا خاصو يمشي فحالو. 

زيد عليه هاداك ديال الوكالة الحضرية. هاداك موقف العقار فكازا. موقف الاستثمار فكازا. اش باقي يدير هادا فمنصبو. حتى هو ما خاصوش يكون فاستقبالك. يحشم على عراضو.

ايلي كانو شي وحدين طغاو فالعقار طبقو عليهم القانون ولكن ما توقفوش قطاع كولو. هاديك حادثة تمارة راها غادية تضرب قطاع العقار اللي اصلا مضروب. 

سيدنا كازا خاصها والي بحال اليعقوبي. كيخرج وكيتحرك ومنوض القوق لكلشي. بحالو المنتخبين ورجال المخزن كلهم كيوليو فايقين. مع هادا كلشي ناعس. 

وينوض هاد الوالي يمشي يشوف غير اش كيوقع فالاستثمار. راه اللي بغى يدير غير ريسطو واخا كاينة ديك الكذبة ديال كلشي الكتروني٬ راه خاصو يرش كلشي. وراهم غاديين بكازا للهلاك يا سيدنا. ما يمكنش يبقاو فمنصبهم وما بغايينش يخرجو من مكاتبهم.

كازا خاصها ثورة برجال جداد. 

موضوعات أخرى

19/03/2024 05:00

جورنال “الدايلي مايل ” بغا يحبس الشائعات لي كتسركل على الأميرة كيت: شهود شافوها كتدور مع راجلها وولادها

19/03/2024 03:00

مرض نادر كينتاشر فالجابون بطريقة كتخلع.. والعلماء مقدروش يعرفو الأسباب ديالو

19/03/2024 00:00

رابطة البوليساريو فالصبليون كضغط على وزارة الثقافة باش تحيد الاعتراف بمغربية الصحرا من الجريدة الرسمية ديال إسبانيا