كود – عن بي بي سي //
عطات حركة طالبان أوردر لمذيعات التلفزيون الأفغاني وكل العيالات اللي كيبانو فالشاشات باش يغطيو وجوههم فالوقت ديال البث.
وقال ناطق بإسم “الشرطة الدينية” التابعة لطالبان ل”بي بي سي” بأن وسائل الإعلام تخبرات بالمرسوم الجديد/القديم نهار الأربعاء.
وجا هاد القرار من بعد جوج سيمانات على صدور أمر كيفرض على كل العيالات يلبسو النقاب فالأماكن العامة واللي مابغاتش غادي تواجه عقوبات صارمة.
ومعلوم أن القيود على النسا وقمعهم تزاد مؤخرا فأفغانستان، ولاو ممنوعات من السفر بوحدهم والليسيات سدو بيبانهم فوجه كل البنات، وهكذا تمنعو الآلاف من حقهم فاستكمال القراية.
وقالت صحفية أفغانية، خدامة فقناة تلفزيونية محلية فالعاصمة كابل، مابغاتش تذكر سميتها، (قالت) أنها تصدمات فاش سمعات هاد الخبار.
وزادت فتصريح ل”بي بي سي”: “كيضغطو علينا بشكل غير مباشر باش يمنعونا من الظهور فالإعلام وخصوصا عبر شاشات التلفزيون”.
وتساءلات نفس الصحفية: “كيفاش نقدر ندير خدمتي وأنا فمي مغطي ومخنوقة؟ كيفاش نقدر نقدم نشرة الأخبار بشكل عادي؟ مع العلم أنه خاصني ضروري نخدم حيت أنا اللي كنصرف على عائلتي”.
وهاد القرار ديال حركة طالبان غادي يبدا تطبيقو ابتداء من نهار 21 ماي، حسب ما ذكراتو وكالة “رويترز” للأنباء نقلا عن ناطق بإسم وزارة “الأمر بالمعروف و النهي عن المنكر ” التابعة لنظام الحركة الخوانجية الحاكمة فأفغانستان.