عفراء علوي محمدي- كود//

ولاو الأطباء دابا مطالبين بكتابة الوصفات الطبية بخطأ مقروء، من بعد المصادقة على المرسوم رقم 225.21.2 الصادر ف17 يونيو 2021، المتعلق بمدونة أخلاقيات مهنة الطب، والقاضي بتعديل المادة 39 فيه.

والغاية من هذ المرسوم الجديد هو تمكين المواطنين من المعلومة المتعلقة بالأدوية اللي خاص ياخدو، والمقدار ديالها، بشفافية وبوضوح، باش ماتبقاش لوردونونس حكر غير على مهنيي الصحة وصحاب الفارماسيان، خصوصا وأن خط أغلب الاطباء مخرمز وصعيب على الفهم.

والمادة 39 كتقول “يجب على الطبيب أن يصف العلاج بالقدر الكافي من الوضوح وأن يحرره بخط مقروء وأن يحرص على أن يفهمه المريض ومحيطه وأن يتحرى تطبيقه بشكل جيد”.

فتعليقو على المرسوم الجديد، قال بدر الدين الداسولي، رئيس النقابة الوطنية لأطباء القطاع الحر، أن هذي حاجة ماتستهلش تكتب كَاع، حيت الأغلبية ديال الأطباء ولاو يكتبو بالحاسوب، كيف كاينين حوايج مهمة كان خاصهم يهضرو عليها فإطار الاخلاقيات، مواضيع مهمة كثر من هذي.

وتساءل الداسولي، فتصريحو ل”كود”، واش كاين شي معايير ديال تحسين الخط، حيت كاين اللي يقرا لوردونونس وكاين اللي تجيه واضحة، كيف كاين لي لا.

وهذشي بالنسبة للداسولي كيدخل فمدونة المسؤولية الطبية اللي خاصها تصايب، وفيها ما للطبيب وما عليه تجاه المريض والمريض شنو هوما حقوقو وواجباتو حتى هو إزاء الطبيب، وخاص ورش كبير يكونو فيه قضاة ومحاميين وممثلين على المواطنين، “مايمكنش نكونو فتنا 50 عام على الاستقلال وباقي ماعندناش”، حسب تعبيرو.

وبالنسبة للمواضيع المهمة اللي كان خاص مدونة الأخلاقيات تهتم بيها، كيخص الفورماسيون لبائعي الأدوية فالفارماسيانات، ويتم احترام الوصفة الطبية، ويتلقى حل لمشكل خروج 70 فالمية من الأدوية بدون وصفة طبية، ومعضلة التداوي الذاتي اللي كتقدر تخرج على صحة وسلامة المواطنين.

وكيشوف الداسولي أن هذ المرسوم مضحك، وماكيعطي حتى قيمة مضافة بالنسبة للمواطن، حيت الأهم هي يكونو ضوابط لحماية صحة المواطنين، ماشي الخط.